Diaranson mainta durante un conferencia di prensa di Stichting Monumentenfonds Aruba, Sra. Anne Witsenburg, directora di e stichting, a presenta finalisacion di e restauracion di e parti pafo di e edificio situa na Steenweg 19.

Sra. Witsenburg a splica un poco di e historia di e edificio y tambe a elabora ariba e plannan cu tin pa e restauracion di e parti paden di e edificio. Minister di Finanzas y Cultura, Sra. Xiomara Maduro tambe tabata presente y a dirigi algun palabra di gratitud pa e trabou realisa.

Historia

Sra. Witsenburg a conta cu e edificio di Steenweg 19 tin 96 aña di existencia. E prome 10 aña e tabata un vivienda y famia Croes a construi e cas. Despues di 10 aña Sr. Addison Croes y Gustave Nouel a tuma e decision pa cuminsa cu Botica Aruba. E famia tabata biba na e piso di ariba y e botica tabata na e piso di abao. Na aña 1992 a cuminsa cu e negoshi El Mercado y hopi hende na Aruba ta conoce e edificio como Palais Hindu, El Mercado. Despues di esey e edificio a keda bashi y cera pa hopi aña.

El a splica cu e cas a bay ariba findishi y Monumentenfonds a wak con e prijs a keda baha, baha, baha y baha mas te cu e momento a yega y nan a tuma e decision pa cumpr’e mirando cu niun persona tabata interesa pa cumpr’e “Nos a bisa eigenlijk si niun hende kier cumpr’e, si niun hende kier haci esfuerso pa haci un restauracion, nos ta bay cerca notario y riba findishi nos a cumpra e cas aki”, el a bisa.

Renobacion

Sra. Witsenburg ta splica cu e compra di e edificio aki ta un riesgo cu Stichting Monumentenfonds a tuma ya cu normalmente nan ta cumpra edificionan pa restauracion ora cu nan sa kico e edificio lo bira y ora ya tin un huurdo interesa den e edificio cu por paga e huur di locual stichting por paga hipoteca, mantencion etc., sinembargo e stichting a tuma e riesgo y Sra. Witsenburg ta indica cu nan ta contento cu a haciele.

E modelo di renobacion cu Stichting Monumentenfonds a implementa pa e renobacion aki tabata un model nobo, Sra. Witsenburg a splica, mirando cu no tabatin niun persona interesa den e edificio ora cu esaki “tabata na werki”.

“Nos cuminsa cu un proyecto cu nos ta yama ‘casco restauratie’, kiermen un restauracion di parti pafo so. Nos a haci hopi investigacion, wak con e tabata, e balcon na banda, danki na e famia cu a comparti potretnan di antes y asina nos por reconstrui precies con e tabata antes y awe nos ta celebra cu nos keda cla cu e parti pafo y nos ta wardando e parti paden”, el a señala.

Despues cu Stichting Monumentenfonds Aruba a cumpra e edificio Monumenten Bureau a duna e seyo di monumento proteha cu ta algo hopi importante tambe, Sra. Witsenburg a indica. “Tin 37 monumento proteha so na Aruba aworaki y cada un cu nos por pone e seyo riba nan, cu Monumenten Bureau por pone su seyo riba nan, e ta un orguyo pa nos tambe”.

Futuro

“E futuro eigenlijk no ta den nos man”, el a bisa. E edificio falta hopi ainda pa por termina den e parti interior, el a indica cu falta plafond nobo, vloer nobo y e murayanan mester wordo termina. El a splica cu mirando cu ainda nan no sa kico precies e edificio lo bira, nan ta en espera di un huurdo cu lo firma un acuerdo di huur, pa cuminsa cu e di dos fase pa asina adapta e parti interior di e edificio na e necesidad di e usuario. “Asina nos por garantisa cu e edificio aki di Steenweg 19 lo t’ey pa futuro generacionnan di Aruba y cu storia ta keda na bida”, el a agrega.

Minister Xiomara Maduro cu tambe tabata presente den e conferencia di prensa a expresa su gratitud pa e trabounan realisa cu e edificio historico aki. “Cada biaha cu nos restaura un monumento na pais Aruba, nos como pais como pueblo ta haya e oportunidad di haya sa su historia”, Minister Maduro a bisa “Un monumento cada bes cu e wordo restaura den su gloria e lo conta bo su historia y p’esey awe cu placer mi ta akinan, hunto cu Monumenten Fonds gradiciendo nan pa e trabou y pa e insistencia pa asina awe Steenweg 19 a wordo restaura den su gloria”.

El a extende e invitacion tambe, specialmente na edificionan historico priva, pa mira e restauracion di e edificionan historico pa asina nan por tuma e oportunidad di renoba e edificionan historico priva tambe. Minister Maduro a tuma nota y a menciona specificamente e edificio situa dilanti di Steenweg 19 cu un tempo tabata wordo usa pa SVB, “nos lo ta hopi contento si un dia tambe e doño lo kier yuda nos den conserva historia di nos pais”.

Minister Maduro a duna palabranan di elogio na Stichting Monumentenfonds Aruba tambe splicando cu, aunke hopi biaha e fondonan no ta facil pa por yega na dje, Monumentenfonds ta haci un bon trabou ya pa 25 aña caba. “Asina por percura pa nos monumentonan na nos pais conta nan storia. Pues danki Monumenten fonds, danki na boso tur pa por a haci trabou, tur e arkitectonan tambe y tur esnan cu ta encarga cu trabou di construccion akinan, hopi danki y ohala cu pronto nos por conoce un huurdo pa e edificio akinan”.