(AP) – Oficialnan di salud Mericano a autorisa riba diamars e prome sigaria electronico na Merca, bisando cu e productonan pa “vaping” di R.J Reynolds por beneficia hendenan adulto cu ta huma.
E Food and Drug Administration (FDA) a bisa cu datonan entrega pa e compania a mustra cu su sigaria electronico Vuse a yuda hendenan cu ta huma, sea stop di haci esaki of reduci nan uso di un manera significante, cual actualmente ta e causa prevenibel mas mira di morto na Merca.
E decision ayera, cual ta prome di su tipo, ta parti di un esfuerso di Food and Drug Administration pa trece critica cientifico na e industria di vaping, cu tin balor di biyones di dollar, despues di añanan largo di retraso.
Na september, e agencia a bisa cu nan a rechasa aplicacion di mas di un miyon sigaria electronico y productonan relaciona, mayormente pa motibo di e atraccion potencial cu esakinan por tin cerca hobennan menor di edad. Reguladornan a retrasa e decision riba mayoria di e companianan cu ya ta bende e productonan aki, incluyendo e lider den e mercado, Juul.
E decision di Food and Drug Administration ta aplica solamente na Vuse su Refillable Solo Power y su sabor di tabaco, cual ta contene nicotina. E Food and Drug Administration a bisa cu nan a rechasa 10 otro peticion di e compania pa otro productonan cu diferente sabor, pero no a revela mas detaye tocante esaki. E agencia te ainda ta revisando e compania su peticion pa bende un formula di nicotina cu sabor di menthol.
“Awe su autorisacionnan ta un paso hopi importante na caminda pa sigura cu tur producto di tabaco pasa door di un evaluacion cientifico robusto di Food and Drug Adminstration prome cu nan drenta mercado,” Mitch Zeller, director di Food and Drug Administration su centro di tabaco, a bisa den un declaracion. “E trahadonan su datonan ta demostra cu su productonan di tabaco por beneficia e adultonan cu ta adicto na humamento, cu cambia e sigaria pa e productonan aki, sea completamente of cu un reduccion grandi den consumo di sigaria.”
Sigaria electronico a aparece prome na Merca mas di un decada atras, cu e promesa di provee personanan cu ta huma cu un alternativa menos dañino na e humamento di tabaco tradicional den sigaria. E dispositivonan ta keinta un solucion di nicotina y converti esaki den un vapor cu ta inhala.
Pero tin poco estudio extenso y profundo tocante e efectividad di e sigaria electronico y su habilidad pa yuda un persona cu ta huma stop di haci esaki completamente. Y esfuersonan di e Food and Drug Administration pa cuminsa revisa e productonan aki, y loke nan ta bisa di haci cada biaha, a topa cu retraso causa pa e industria y interes politico di e competencia.
Den añanan reciente, e mercado di vaping a crece te inclui centenares di compania cu ta bende un variedad di producto y solucion di nicotina den varios sabor y concentracion. Pero e mayoria di e mercado ta controla pa un par di compania incluyendo Juul Labs, cual ta parcialmente di Altria, y Vuse.
Pa por keda riba e mercado, e compania mester por demostra cu datonan y resultado di testnan cu nan producto ta beneficia e salud publico. Den practica, esaki kiermen demostra cu adultonan cu ta huma tin hopi probabilidad di stop di haci esaki of reduci e frecuencia di nan humamento danki na e producto, pero tambe cu tin tiki probabilidad cu e hobennan lo bira adicto na esaki.
