Empresario Wichard van der Meulen na 2018 a presenta un plan pa construccion di un planta di produccion pa cultivo di cannabis medicinal riba tereno di refineria na San Nicolas. Esaki lo mester a genera alrededor di 500 cupo di trabao y contribui mas di 100 miyon den belasting, segun un relato den corant Amigoe di ayera.
Tres aña despues ainda e empresario ta bisa di ta cla pa cuminsa y tin sosten di financiadornan y partnernan. Menos ta e sosten cu e ta ricibi di politico, segun e relato di Amigoe, cu a entrevista Van der Meulen.
Van der Meulen tabata activo como fiscal hurista na Aruba durante varios aña. Awo, el a bisa cu ta wardando solamente riba e decision di gobierno pa entrega tereno no-usa di refineria, y e ley cu lo haci posibel e cultivo y produccion di cannabis medicinal.
E proyecto di Van der Meulen ta carga e nomber di Rial Aruba One Growers. Su financiadornan ta institucionnan financiero local, pero tambe algun sociedad inversionista Hulandes. El a bisa cu e idea ta pa adkiri e capital na Hulanda y entrelasa e capital di prestamo localmente a traves di un consorcio di Aruba Investment Bank (AIB). “Mi ta bin di mundo financiero”, Van der Meulen a bisa Amigoe. “Mi sa cu esaki ta posibel, pero ban cuminsa cu legislacion.”
E legislacion cu mester haci cultivo y produccion di cannabis posibel ainda ta den Staten. Raad van Advies a haci pregunta critico riba entre otro e posibilidad economico di un industria di cannabis na Aruba, pero tambe riba e relacion di gasto-beneficio pa gobierno di Aruba y seguridad, mirando e reputacion di Aruba como pais di transito pa droga.
E empresario ta sigura cu e ta mira cu e beneficionan pa sociedad di Aruba ta enorme. Tres aña pasa el a presenta su proyecto entre otro cerca San Nicolas Business Association (SNBA), Camara di Comercio (KvK), Departamento di Asunto Economico, Comercio y Industria (Dezhi) y Belastingdienst, unda e ta considera cu e plan a ricibi un reaccion positivo. E ta bisa ademas cu pa loke ta seguridad, e tereno di refineria ya ta cera.
Pa su proyecto, Van der Meulen a bisa cu tin mester di 90 miyon euro, cu cual e kier construi riba tereno di refineria un facilidad di produccion interior (indoors) di 25mil meter cuadra, cu un laboratorio steriel, salanan di cultivo, sala pa seca y mashin di extraccion. E cultivo ta bay tuma luga den un setting di laboratorio cu trahadonan den ekipo medico y cu net den nan cabey. Van der Meulen ta insisti cu ta trata di un industria farmaceutico di balor halto. Pa su proyecto el a saca inspiracion di e compania Canades, Canopy Growth na Smith Falls. Y pa conseho y ayudo, el a recluta bureau di investigacion y consulta, Delphy, un empresa vincula na universidad di Wageningen cu no ta solamente provee tecnica sino tambe ‘master growers’. Segun Van der Meulen, Delphy ta duna un garantia pa produccion di minimo 50mil kilo di cannabis medicinal. Delphy tambe lo duna supervision di e construccion di e facilidad di produccion na Aruba.
E compania di Wageningen tambe ta organisa e oferta pa parke solar, cu mester provee e energia necesario na e fabrica di cannabis. Van der Meulen a splica cu nan tin mester di 32 megaWatt, un tercer parti di e uso diario di energia na Aruba, loke WEB y Elmar no por provee. Ademas, energia solar ta miho pa medio ambiente. Delphy a calcula cu cultivo a base di energia fossiel ta demasiado caro, pues tin mester di un parke solar ‘off-grid’ di 435mil meter cuadra, y pa esaki, Van der Meulen ta considera cu tin suficiente espacio riba tereno di refineria.
For di 2019, Van der Meulen a solicita reunion cu varios minister pa presenta su plannan, pero no a ricibi ningun contesta. Prome minister, Evelyn Wever-Croes, despues di varios solicitud a laga informa cu su propuesta no ta discutibel pasobra e tereno ainda tabata den man di Citgo Na momento cu pa mita di 2020 e refineria a pasa back na RdA, Van der Meulen a busca contacto un biaha mas cu Wever-Croes, pero el a bisa cu su consehero finalmente a pon’e den contacto cu director di RdA. Pero esaki tampoco a resulta den un reunion, pa motibo cu segun e director, prome tin mester di siguransa riba un operador nobo pa refineria. Segun Van der Meulen ambos actividad no mester stroba otro, y e tereno cu e tin den su mira en todo caso no ta necesario pa e refineria, mirando cu segun e, e no ta den uso pa varios decada caba.
Wever-Croes den pasado a informa Amigoe cu no tin intencion di duna mas tereno di refineria otro cu esnan cu tin intencion di bay pa reifneria mes, tanten cu e negociacionnan cu Quanten Consortium Aruba ta andando.
