(AP) – Polis Britanico a anuncia cu nan no lo tuma accion den contra Prins Andrew despues di un revision na su persona causa pa un di e victimanan cu a acusa Jeffrey Epstein, ken a alega cu e Prins a abusa di su persona sexualmente.

Virginia Giuffre ta alega cu Epstein a trafica su persona pa tene relacion sexual cu Prins Andrew na London den aña 2001, e tabatin 17 aña di edad y pa causa di esaki menor di edad tambe bao di ley di Merca. E ta demandando e Prins den un corte di Merca.

Andrew, e di dos yiu di Reina Elizabeth II, ta rechasa e acusacionnan. El a conta BBC den un entrevista na aña 2019 cu e nunca a tene relacion sexual cu Giuffre, bisando “esaki no a pasa.”

Na augustus, London su Metropolitan Police Force a cuinsa un investigacion y reviso di e acusacionnan conecta cu e difunto ofensor sexual Epstein. Hefe di cuerpo policial Cresside Dick a bisa na e tempo cu “ningun hende ta riba ley, ni ta scapa di esaki.”

E departamento aki di e cuerpo policial a bisa den un declaracion durante e weekend cu nan “revision a conclui y nos no lo ta tumando mas accion pa cu e caso aki.”

Tambe el a bisa cu nan no lo tuma accion pa cu e acusacionnan, cual a ser reporta prome pa Channel 4, cu Epstein su supuesto complice, Ghislaine Maxwell, a trafica, manipula y abusa di muhenan y muchanan hoben den U.K.

Maxwell, un persona hopi conoci den e farandula di Britania, ta den Prizon na Merca wardando pa su caso bay huicio pa e cargonan cu el a yuda busca y trece mucha muhenan hoben pa Epstein por haci su abuso.

E cuerpo policial en cuestion a bisa cu nan lo sigui coopera cu otro agencianan di ley cu ta manehando e investigacion pa cu e casonan y cargonan asocia cu Epstein.

Despues di simannan largo di lucha, abogadonan di Prins Andrew a admiti fin di luna pasa cu e Prins si a ricibi notificacion formal di e demanda di Giuffre. E Prins mester entrega respuesta pa cu e demanda prome cu dia 29 di october.

Siman pasa, un hues di Merca a bay di acuerdo pa Prins Andrew su abogadonan ricibi un copia di e acuerdo di aña 2009 entre Giuffre y Epstein cu nan ta kere lo causa cu e caso civil contra di e Prins lo keda nulo.

Prins Andrew, ken tin 61 aña di edad, a keda retira di responsabilidadnan real publico pa causa di e scandal tocante su amistad cu e pedofiel Epstein, ken a keda haya morto den centro di detencion federal na New York den augustus di aña 2019 mientras cu e tabata warda huicio pa e cargonan di trafico sexual den su contra. Su morto a keda declara como un suicidio.

Tipicamente, The Associated Press no ta identifica personanan cu ta bisa nan ta victima di asalto sexual al menos cu nan dicidi bisa esaki publicamente, di mesun manera cu Giuffre a haci.