(AP) – Varios manifestante di e grupo di activista ambiental yama Extinction Rebellion a blokea un caya frecuentemente druk riba dialuna den bisindario di e cas temporal di Hulanda su parlamento, marcando e comienso di un siman di protesta cu e grupo a plania na Den Haag prome cu un conferencia tocante clima di ONU cu ta habri dia 31 di october.
E demostracion a cuminsa ora cu manifestantenan a bini cu un boto geel, cu e palabranan “Citizens decide” (e ciudadanonan ta dicidi) y a para esaki memey di caminda. Otro manifestantenan a cana bay otro crusada y a cuminsa sinta of drumi riba caya mientras cu polis tabata mira.
Un homber a sinta den trafico cu un borchi cu tabata bisa den Hulandes “E caminda aki no tin salida,” mientras cu otronan tabata parkeer nan auto pa blokea e caminda. Un muhe a wanta un borchi bisando “e planeta prome cu ganashi.”
“Nos ta welonan, tatanan y yiunan,” un di e manifestantenan para riba e truck a bisa e otronan presente. “Nos ta parti di un movemento internacional cu ta lucha pa un planeta unda cu nos por biba.”
E demonstracion Hulandes aki a bini un dia despues cu 80 organisacion a tuma parti den un protesta na Brussels pa motiva e lidernan mundial pa tuma mas accion di combate contra e cambio di clima na e cumbre na Glasgow, Escocia.
Extinction Rebellion a bisa cu 700 hende a participa den e manifestacion. E grupo a bisa den un mensahe manda pa reportero cu nan ta “pidiendo y haciendo yamado pa husticia cu e clima.”
“Haci loke ta necesario pa stop cu e perdida di biodiversidad y haci Hulanda clima neutral den aña 2025,” e grupo a bisa.
Un di e activistanan participando a haci yamado pa cooperacion mas cercnano entre politiconan y investigadornan pa por yega na metanan mas efectivo y cla pa e conferencia di Glasgow.
“Nos ta kere cu e legisladornan mester traha directamente cu e cientificonan di clima pa nos por yega na un imagen mas cla y directo di kico ta necesario. Cual ta e medidanan necesario y ki gradonan di kentamento nos por acepta y cual ta desastroso,” Mira Geirnaert a bisa.
