Ayera mainta, minister di Enseñansa y Deporte, Endy Croes a duna un conferencia di prensa pa asina trece dilanti diferente topico, entre otro, lesnan di landamento ta cuminsa back y dos klas di EPB ta habri e siman aki.

Despues di un conseho positivo di Inspectie Onderwijs, Croes a indica cu nan a aloca fondonan necesario pa por surpasa e overuren di 4% cu tin poni, pa di e forma aki permiti EPB pa por habri dos klas pa 33 mucha cu for di september no por a cuminsa scol pa e motibo ey.

Entre EPB di San Nicolas y EPB di Playa for di ayera a keda confirma cu nan lo tuma contacto den dianan aki cu tur e 33 alumno y nan mayornan pa nan por haya e fecha di ki dia ta bay habri e dos klas aki.

Diahuebs awor lesnan di landamento ta cuminsa back

Manera Croes a informa, nan ta bin solucionando problemanan cu tabata poni na caminda pa enseñansa por haya un miho maneho. Igualmente el a trece dilanti e topico cu tin relacion cu instructornan di landamento, na unda cu segun el a anuncia, siman pasa nan a yega na un solucion riba e parti con nan lo haya nan salario den futuro, con nan lo ubica back na DPS y asina nan lo bay back na e contract anterior cu nan tabatin.

Croes a menciona cu pa garantisa esaki nan a compronde cu pa introduci un persona den e payroll, e mester ta introduci na e sistema corecto prome cu cierto fecha, pa asina por cobra fin di luna. El a bisa cu nan a compronde cu esaki ta e caso, y pa fin di october nan lo cuminsa cobra di acuerdo cu e contract anterior.

El a indica cu esaki a trece cune cu muchanan no por a continua cu nan lesnan di landamento, pa motibo cu no tabatin fondonan suficiente pa por paga e transporte pa muchanan por bay for di scol na e lesnan di landamento. “Den nos propio begroting nos a logra aloca e fondonan necesario, un suma cuantioso riba 300 mil florin”, Croes a bisa.

El a anuncia cu for di diahuebs awor 14 october e lesnan di landamento ta cuminsa, pa di e forma ey por tin e instructor-, docente-, mayor- y muchanan contento cu e parti aki.

Werksternan di SKOA

Un topico cu a bin halando atencion di comunidad ta e werksternan di Skoa. Croes a declara cu diabierna ultimo den un Conseho di Minister nan a trece dilanti un Ministerraad Besluit pa asina crea un comision, na unda cu mañan diaranson, e prome reunion lo tuma luga pa duna direccion y pidi nan pa den 30 dia bin cu conseho y solucionnan concreto.

Pa e comision aki, e director di departamento di Financien ta apunta, igualmente cu director di Departamento di Recursonan Humano, Skoa, entre otro. Croes a comenta cu nan a propone pa tin un bon resultado y nan tambe a propone un persona experto den e comision aki, hunto cu un register accounting y un hurista cu ministerio mes a indica, caminda cu segun el a sigura, e comision aki – cu un decision mediante un MB cu ta den funcion – ta bay presenta solucionnan pa e problema aki.

Den caso aki nan tin dos punto di interes, na unda cu nan mester wak con ta bay sigui paga e werksternan. Ademas un otro preocupacion cu ta trata di un cantidad di aproximadamente 5.4 miyon florin, cu segun Croes a splica, ya cu e fundacion no a ricibi di Financien e placa cu nan tabata ricibi tur luna mas, pa paga na Departamento di Impuesto, “a crea un suma cu mester un claridad riba dje”, Croes a expresa.

Proyectonan di Landspakket

Siman aki Croes a reuni cu dos inspector di Enseñansa di Hulanda, cu ta encarga cu e proyectonan di Landspakket den area di Enseñansa. Nan a duna splicacion riba unda nan ta cu e proyecto, caminda nan a bishita diferente stakeholders pa e investigacion cu ta tumando luga na diferente islanan den Reino tocante Landspakket. Den esaki ta bay bin cu recomendacionnan pa cu e direccion cu Enseñansa na Aruba lo dirigi su mes, segun Croes a comenta.

Manera ta conoci, Croes a reuni cu diferente stakeholders na momento cu nan tabatin reunionnan cu formador, na unda cu Enseñansa semper a bin dilanti. Y segun cierto di nan a anuncia cu leynan ta anticua. “Tin scolnan cu ta prepara muchanan pa bay mercado laboral, pero e ley pa por cuida calidad di Enseñansa no ta existi”.

Nan tin ley pa controla otro tipo di educacion, manera Croes a señala, y cu esey ta bin tumando luga. Pa e motibo ey profesionalnan y tambe Hulanda a trece dilanti e parti aki, na unda cu a yega na e conclusion cu mester bin e comision pa revisa of traha leynan nobo pa nan por keda den e mesun linea.

Openbare Avondleergangen Aruba & Leerwerktraject (OAA)

Riba e mesun linea, Croes a indica cu tambe tin un otro problema cu nan no a soluciona ainda, cu ta trata di OAA. Pa cu esaki el a indica cu nan ta bezig hayando consehonan e siman aki, tanto di Directie Onderwijs y Inspectie Onderwijs, pa asina reuni despues cu OAA pa duna un solucion.

Analisis di infrastructura di cierto scolnan cu DOW

Croes hunto cu DOW a analisa e problema di infrastructura cu algun scolnan ta presenta na e momentonan aki y di esaki el a informa cu scolnan manera Reina Beatrix, St Aloysius y Frere Bonifacius por ehemplo, ta reparti den diferente edificionan cu kisas no ta e miho structura pa duna les na e muchanan.

E siman aki nan lo evalua cierto solucionnan dependiendo di e fondonan disponibel, pa di e forma ey den lunanan dilanti por anuncia bon noticia pa cierto scolnan, Croes a finalisa.