Diabierna mainta Fundacion Arubano di esnan Visualmente Incapacita (FAVI) a tene un actividad di practica y conscientisacion di cruce cu garoti blanco strepi cora den trafico den area di Santa Cruz. E actividad aki ta en conexion cu e dia internacional di garoti blanco cu strepi cora cu lo tuma luga dia 15 di october.

Tur aña FAVI ta organisa nan actividadnan pa conscientisa automobilistanan ariba e personanan cu limitacion visual cu ta haci uso di e garoti blanco strepi cora den trafico. Aña pasa pa motibo di e pandemia esaki a tuma luga virtualmente y e aña aki cu e flexisibilisacion di e medidanan, FAVI a regresa un biaha mas ariba caminda pa asina yuda su clientenan cu ta usa e garoti blanco strepi cora y alabes tambe conscientisa e automobilistanan.

E meta di FAVI ta pa activa clientenan pa asina nan por haci uzo di e garoti blanco cu strepi cora den trafico y den nan bida diario efectivamente. E garoti blanco cu strepi cora ta un simbolo internacional di independencia di e persona cu bista limita. Durante aña e historia di e garoti a haya un lugar solido na unda cu e persona cu tin limitacion di bista ta forma parti di e comunidad.

Sra. Sari Wernet-Kelly, representante di FAVI, ta splica cu FAVI ta contento di mira cu e resultado, e influencia di un aña di trabou di informa comunidad di trafico, ta positivo. “Trafico ta para pa nos cliente y esey ta nos meta, nos meta ta pa sigui conscientisa y tambe siña nos clientenan nobo y esunnan cu t’ey caba e practica di garoti blanco strepi cora den trafico”, el a bisa.

“FAVI a conoce diferente cliente cu a tuma e curashi di mobilisa y mustra cu nan ta parti di e comunidad. Bo por mira nan na banco, supermercado, na scol y na pia di trabao. Nan ta usa e garoti pa por mobilisa pero mas principal nan ta mustra cu limitacion di bista no ta un obstaculo”

Sra. Wernet-Kelly ta splica tambe cu FAVI tin un grupo creciente di 39 mucha y hoben y di e grupo ey tin mas o menos shete hoben cu ta haci uso di e garoti blanco strepi cora di awo caba y esaki ta bayendo di un manera hopi positivo. E ta indica cu e ta wordo acepta na scol y dia 15 di october, e dia internacional di e garoti blanco strepi cora, e maestranan lo bay tin un celebracion y conscientisacion na Colegio San Nicolas

Pa FAVI e conscientisacion y e demostracionnan ariba caya ta keda un parti sumamente importante, unda no solamente automobilista, pero tambe ciclistanan ta tuma nota di e garoti blanco strepi cora. Sra. Wernet-Kelly ta bisa cu te ainda e cooperacion ta bayendo bon, y compara cu 10 aña pasa, esaki a mehora hopi.

E ta splica tambe cu un persona cu tin un garoti blanco strepi cora no mester haci uso di un zebra pad of e verkeersplateaunan pa crusa caminda, e persona por crusa na cualkier skina cu ta sigur semper cu e haci uso di e manera corecto di crusa y señala. Pa e motibo ey FAVI semper ta pidi cooperacion di trafico na momento cu mira un persona cu garoti blanco strepi cora cu ta purba di crusa caminda, pa baha velocidad, duna e persona e oportunidad pa crusa.

Na banda di e demostracionnan di uso di e garoti blanco strepi cora den trafico, FAVI ta organisa diferente otro actividadnan pa stimula e uso di e garoti back bou di nan clientenan, entre otro caminata den naturalesa, caminata pa salud y mobilidad, y nan lo subi sero di Yamanota tambe.