“Nos a experiencia algo hopi nobo y nos por bisa cu nos tata ta e miho tata”
Diadomingo 10 di october un poco despues di 5or di atardi Alzachary y Alzachayla Ras, yiunan di Sr. Heintje Ras a sali for di e mina di fosfaat na Sero Colorado caminda nan a pasa e prome ocho dianan, di e hazaña di 100 dia, hunto cu nan tata bao tera.
Despues di nan salida, Alzachary y Alzachayla tambe a expresa algun palabra y a conta un tiki con nan experiencia tabata den e mina di fosfaat.
“E experiencia aki tabata hopi nobo pa nos. Ora nos a drenta ey bao y ora mi a wak mi tata y ora mi a wak mi ruman muhe, e orguyo cu mi tabatin tabata hopi grandi pasobra mi echt stima mi tata, mi echt stima mi ruman muhe. E experiencia di e ocho dianan a duna nos un experiencia nobo pa nos bisa cu nos tabata aya bao pa 8 dia, nos por bisa cu nos a experiencia algo hopi nobo, nos por bisa cu nos tata ta e miho tata”, Alzachary Ras a bisa.
“E prome dia cu nos a drenta mi no tabata fasil pa nos pasobra ta prome biaha cu nos a keda full un dia. Misa cu awo cu nos a laga nos tata nos ta bay haya su falta hopi y mi kier bisa papi cu nos ta bay haya papi su falta y nos stima papia masha hopi mes”, Alzachayla Ras a bisa.
Sr. Mario Perez, den nomber di e Fundacion Museo di Antiguedad nos Bieunan, a duna un update y a informa cu Sr. Heintje Ras ta den bon condicion, e ta entreteniendo su mes y manteniendo su mes ocupa den e mina. E team di boluntarionan ta monitor y ta percura pa tur cos cana den e direccion corecto.
Aruba Explorers cu tambe ta forma parti di e gran hazaña ta duna tours di e mina di fosfaat den weekend na tur persona cu kier conoce un tiki mas di e historia di Aruba.
