(AP) – A haya Rusia responsabel pa e mayoria di hacking detecta pa Microsoft durante e aña aki, cu 58%, mas tanto actuando den contra di agencia di gobierno na Merca, sigui pa Ucrania, Reino Uni y miembronan Europeo di NATO, e compania a bisa.

E efectividad devastante di un hack na SolarWinds cu a pasa hopi tempo sin detecta, cual a drenta den companianan di informativo tecnologico incluyendo Microsoft, tambe a aumenta e exito di hakernan Ruso na 32% den e aña cabando dia 30 di juni, compara cu 21% den e 12 luna anterior.

China, mientrastanto, tabata responsabel pa menos di 1 di cada 10 intento di hacking den estadonan cu Microsoft a detecta, pero tabata exitoso 44% dia e biahanan cu a purba hack e rednan cu nan tabata kier a ataca, Microsoft a bisa den su di dos Digital Defense Report anual, cual ta cubri juli 2020 te cu 2021.

Mientras cu Rusia ta conoci pa su hacking, Microsoft su reportenan ta ofrece detayenan specifico cu ta poco usual tocante con esaki ta compara cu e otro hackernan contra Merca.

E reportahe tambe a cita atakenan cu intencion di secuestra datonan como un plaga cu ta creciendo y ta serio, cu Merca, siendo e pais mas ataca, a ricibi tripel di e golpinan cu e di dos pais mas ataca a ricibi. E secuestro di datonan ta criminal y motiva pa ganashi financiero.

Den contraste, e hacking haci na estadonan ta cu intencion di reuni y haya inteligencia, sea pa seguridad nacional of comercial of pa bentaha strategico, y pa e motibo aki ta generalmente tolera pa gobierno, cu operadornan cibernetico di Merca entre esunnan cu mas habilidad. E reportahe haci pa Microsoft Corp, cual ta traha di cerca cu gobierno di agencianan di Washington, no ta papia tocante hacking di gobierno di Merca.

E hack cu a sucede na SolarWinds tabata un berguensa asina grandi pa gobierno, cu el a causa algun abogado di Washington demanda algun forma di vengansa of contra e atake. President Joe Biden a bisa cu e tabatin dificultad purbando di saca afo unda pa defini cual actividad cibernetico ta permisibel. El a manda advertencia na president Vladimir Putin, pidiendo e pa bay tras di e criminalnan purbando di secuestra dato, pero varios administracion di siguridad cibernetico a bisa e siman aki cu nan no tin evidencia di esaki.

En general, hacking di estado tin un averahe di exito di 10% pa 20%, segun Cristin Goodwin, ken ta cabesante di Microsoft Digital Security Unit, cual ta enfoca riba e nacion su actornan di estado. “E ta algo cu ta hopi importante pa nos purba di keda dilanti, y sigui baha e cantidad di exito aki, pa motibo cu mientras mas abao e ta, mas bon nos trabao ta.” Godwin a bisa.

Goodwin a bisa China su “metanan geopolitico” den su spionahe cibernetico recien ta specialmente notabel, incluyendo atake riba ministerionan stranhero di America Central y paisnan unda cu e ta haciendo un iniciativa di inversion den infrastructura. E encuentronan aki ta demostra cu e interes di e spionnan cibernetico Chino su interes ta den propiedad intelectual.