Durante un rueda di prensa diabierna mainta, Quota Internacional Aruba a lansa oficialmente e campaña di conscientisacion ‘Siman di Kibra Silencio’. Sra. Gwendolyn van Trigt, miembro di Quota Internacional Arubam a duna informacion ariba e campaña y e importancia pa test oido.

Quota Internacional Aruba ta organisa e campaña di conscientisacion ‘Siman di Kibra Silencio’ pa 32 aña caba. Sra. Van Trigt ta splica cu durante e campaña aki ta organisa testnan gratis pa henter e comunidad di Aruba y e aña aki no ta excepcion. A pesar di e retonan cu e pandemia di COVID-19 ta trece cune, Quota lo brinda e oportunidad na tur persona den comunidad pa participa den e Siman di Kibra Silencio.

Durante e siman aki Quota Club conhuntamente cu ayudo di varios instancia lo pone disponibel un siman largo pa henter pueblo di Aruba por controla nan oido completamente gratis. “Aunke manera menciona caba, e reto di e pandemia ta haciele mas dificil, corda cu perdida di oido no tin cunes ni bao di ningun circunstancia. P’esey ta hopi importante pa nos por sigui duna y ofrece e testnan gratis y e oportunidad na nos comunidad di Aruba en general”, Sra. Van Trigt a bisa.

E ta splica cu e uso di tapaboca ta haci hopi mas dificil pa e personanan cu tin deficiencia di oido por comunica drechi cu otro personanan, pasobra no por haci e acto di lip lezen y asina por comunica apropiadamente. E ta enfatisa e importancia pa haci control di oido trempan, pasobra hopi biaha nos no ta detecta cu tin problema cu oido. Si test trempan, por detecta e problema trempan y asina por ricibi ayudo trempan pa cu esaki. “Cu oido malo ta asina dificil pa comunica cu e hendenan rond di nos, y hopi biaha esaki ta trece asina tanto problema specialmente pa nos famia cu ta rond di nos tur ora”, el a bisa.

“P’esey mes Quota Internacional di Aruba ta encurasha tur hende pa probecha di e siman aki y bin test e oido durante e siman di 11 di october te cu 15 di october proximo. E test no ta haci ningun tipo di dolor y ta hopi lihe y bo ta haya e resultado mesora”, el a agrega.

E instancianan cu ta yuda Quota Internacional Aruba durante e siman di kibra silencio ta The Specialists Aruba y Fundacion pa Esnan cu Problema di Oido (FEPO). “Di antemano nos ta gradici The Specialists y FEPO cu semper ta coopera pa asina nos tin hopi mas oportunidad pa nos por haci hopi mas test”, Sra. Van Trigt a bisa.

E lema di Quota Internacional Aruba e aña aki ta ‘Cuida bo mes y Cuida bo oido’. Sra. Van Trigt ta indica tambe cu e oido ta algo sumamente importante pasobra ademas di perdida, e ta haci un impacto ariba e bida social, emocional y hasta aworaki ta detecta cu perdida di oido por causa, of ta un causante, mas lihe pa malesa di Alzheimers pa hendenan mas jong. “Nos ta encurasha cuminsa test trempan y probecha e test gratis cu Quota ta ofrece e aña aki atrobe.”

Quota Internacional Aruba ta haci un yamada special na e hobennan cu ta expone nan mes na zonidonan hopi duro pa pasa durante e Siman di Kibra Silencio y controla nan oido. Alabes Quota Club Aruba ta haci peticion tambe na e mayornan pa cuminsa na cas, y cuminsa cu e chikitinnan. “Preveni ta miho cu lamenta pasobra contra sordera no tin mucho cos cu por wordo haci, sino aparatonan y no ta tur hende por bin na remarca pa un implante”, Sra. Van Trigt a bisa. “Nos ta spera cu hopi hende probecha di e oportunidad unico aki pa bo por test bo oido completamente gratis y bo por haya resultado mesora”.

 

Pa participa den e siman di kibra silencio y test oido gratis cu Quota Internacional Aruba mester yama y inscribi via un di e instancianan cu ta participa den e campaña di Kibra Silencio.