Concepto di ley pa maximalisa salario di funcionarionan halto ta cla

No ta asina cu a pospone e sosten di likides pa motibo di Ley Normering Topinkomens (Ley Standarisacion Salarionan Top) of e maximalisacion di salarionan pa funcionarionan halto, LNT, tabata reaccion di Prome Minister Evelyn Wever Croes na Bon Dia Aruba.

E comentario aki ta bin a base di locual Secretario Demisionario pa Asuntonan di Reino drs. Raymond Knops a splica Tweede Kamer pakico a wanta cu e sosten di likides pa Aruba.

“Ministerio pa Asuntonan Interior, BZK, a informa Aruba por escrito cu a pospone e sosten di likides di e di 4 kwartaal pa motibo cu no a cumpli cu rekisito di entrega un plan di accion pa corta 60 miyon pa aña den cuido dia prome di Augustus 2021 na College Aruba financieel toezicht, CAft,” Prome Minister mr. Wever Croes a informa.

Maximalisacion salario funcionario halto
 Segun Prome Minister Wever, e LNT, esta e ley maximalisacion salario funcionario halto den sector publico y semi publico, ya tabata cla den concepto y a bay Raad van Advies tambe. “Adicionalmente por informa Gobierno lo adapta e LNT a base di rekisito manera stipula den decision di Conseho di Minister di Reino di 24 di september 2021.” Segun Sra. Evelyn Wever Croes, e LNT di Aruba ta esun cu ta yega mas cerca di Wet Normering Topinkomens di Hulanda, WNT, compara cu e otro paisnan. “Es decir no tin hopi punto pa adapta. Pa aspecto di pensioen tabata en espera di un suma standarisa cu ta afina cu region, pa asina preveni cu ‘brain drain,’ pa por finalisa esaki.” Prome Minister a sigui bisa cu conforme decision di 24 di september 2021 di Conseho di Minister di Reino, tambe lo finalisa e punto di pensioen tambe den e concepto actual y na tempo.

E LNT ta conta pa Ministerio di pais Aruba, companianan estatal, Parlamento, Raad van Advies (cu excepcion di e Presidente), Algemene Rekenkamer Aruba. Pues pa tur entidad huridico institui por medio di ordenanza nacional (landsverordening) y estableci na Aruba cu accionnan (aandelen) of certificado parcialmente of completamente den man di pais Aruba. Tambe companianan cu tin relacion financiero cu pais Aruba y di cual pais Aruba ta nombra un of mas miembro di directiva of organo di supervision of tin influencia di otro forma riba maneho y finalmente organisacion cu pa un periodo tras di otro di 3 aña ta ricibi un of mas subsidio cu hunto cada aña ta resulta den mas di 50% di e entrada di dicho organo den e aña specifico.