Diabierna ultimo, Departamento di Cultura a organisa un training, un tayer ariba e tema di cultura di Aruba. E tayer aki tabata titula ‘Educa cu Cultura’. Director di Departamento di Cultura Aruba (DCA), Sr. Siegfried Dumfries y Sra. Angeline Vrolijk-Maduro, Beleidsadviseur di DCA y alabes lider di e proyecto y training ‘Educa cu Cultura’, a duna splicacion di kico e tayer aki ta encera y kico e meta principal pa cu esaki ta.

E prome tayer aki di ‘Educa cu Cultura’ tabata specialmente pa funcionarionan den maneho di gobierno. Durante e tayer presenta e concepto y principionan basico di locual cultura ta nifica. Departamento di Cultura conhuntamente cu Ministerio di Cultura, UNESCO y tambe Biblioteca Nacional a organisa e tayer aki unda cu diferente departamentonan di gobierno a wordo invita pa e prome sesion.

Sra. Vrolijk-Maduro a splica cu e tayer aki tabata un adelanto di e training di UNESCO cu lo tuma luga na final di october, y lo ta un training dirigi na henter Caribe Hulandes. “E training tabata eigenlijk den conexion cu e training cu ta bay bin pasobra e training lo hiba como topico e herencia cultural y material”, el a bisa. “UNESCO mes tin un tratado di aña 2003 cu tin cu wordo implementa den e islanan di Caribe Hulandes, e yama ‘Convention for the Safeguarding of the Intangible Cultural Heritage’ y door di esey nan ta bay bin cu e training aki”.

El a splica tambe cu aunke e prome tayer a enfoca riba e funcionarionan den maneho di gobierno, e meta di DCA ta pa e tayer por yega na tur hende. “Nos lo sigui despues cu e funcionarionan di gobierno mes y despues nos lo bay den sector priva, y eynan nos kier tambe pa e media tuma e training di nos, pasobra nos meta final ta pa yega na tur hende cu e training aki”.

Durante a tayer a toca diferente tema, segun Sra. Vrolijk a indica. A trata e tema, kico ta cultura? El a indica cu na principio a laga participantenan scucha tres tumba y nan mester bisa di cua di e islanan ABC cada tumba ta y cu a interactua hopi cu e participantenan. “Nos a bisa nan tambe pa trece un obheto cu ta nifica cultura pa nan y nan a splica pakico e obheto specifico aki ta nifica cultura, y esey ta e ora un herencia cultural material”, el a bisa.

Apart di e esey, e participantenan a haya informacion y splicacion tambe cu cultura no ta simplemente folklore. Segun Sra. Vrolijk-Madura a indica, hopi biaha hopi hende ta hinca den nan cabes cu cultura ta folklore so, y eynan el a splica un poco cu cultura ta arte, cultura ta gastronomia, cultura ta religion apart di folklore cultura tambe ta idioma. “Kiermen asina nos a splica nan cu cultura tin diferente pilar y e pilarnan ey ta forma cultura”.

DCA ta usa e definicion di cultura cu UNESCO ta stipula, cual ta bisa cu cultura ta un set di caracteristicanan spiritual, material, intelectual y emocional cu ta particular di e sociedad of di un grupo social cu ta abarca no solamente arte y literatura, pero tambe e estilo di bida, e forma di biba hunto, e sistema di balornan, tradicionnan y creencianan. DCA a resumi: “Nos a resumi definicion aki y papiando di cultura en general, ‘Cultura ta nos forma di biba’.”

Un otro tayer cu Sra. Vrolijk-Madura a indica lo tuma luga muy pronto, dia 15 di october, lo ta specialmente pa e docentenan di CKV. El a splica cu Aruba a firma un declaracion di intencion caminda a pone cu educacion di cultura mester wordo duna na e islanan, na e scolnan y pa e motibo ey e siguiente tayer lo ta specialmente pa docentenan di CKV. “Esey ta forma parti di arte y educacion. E docentenan di CKV ta bay yuda nos pa nos por haya cultura den educacion pasobra sin nan nos no por”, el a bisa.

Sr. Dumfries, director di DCA, a splica tambe cu durante e tayer ‘Educa cu Cultura’ a discuti y a trece dilanti con diferente actor cu ta carga cultura di Aruba ta wak esaki, kico falta den tema aki y asina a wak tambe kico por haci den cooperacion, pa asina por eleva e nivel di e manera cu cultura ta wordo biba na Aruba.

El a indica cu hopi trabaonan a wordo haci y ta wordo haci den e ramo di cultura aki na Aruba y cu ta importante ta pa tin un continuidad den e trabaonan. “Mirando cu den e compleho gubernamental tin biaha bo ta haya cu e continuidad no ta sigui como tal, ta importante pa semper nos por sigui traha ariba e diferente areanan aki y un di e areanan importante ta educacion di arte y cultura.”, el a bisa. “Aworaki, den cuadro cu e vierlande overleg, un overleg cu Hulanda, Sint Marten, Corsou, Boneiro y Aruba tambe ta den e constelacion aki, ta bay crea un decreto ministerial nobo pa sigui traha ariba e aspecto di arte y cultura na scolnan”.

El a splica cu aunke DCA ta activo y anualmente tin proyectonan pa scolnan, ta importante pa esaki sucede structuralmente. “Nos ta hopi consciente di esey, nos proyectonan ta hopi enfoca ariba esey y nos ta traha hopi cu scolnan, cu directiva di scolnan; pero hopi ta menciona cu lo ta bon pa tin structuralmente continuidad di educacion primario pa sigui cana te educacion secundario”, el a bisa.

“Esey bo por logra ora bo tin un Ministerio di Enseñansa y Cultura hunto. Esey no ta kita cu e manera cu e ta funciona aworaki no ta optimal, pero semper por trece cultura structuralmente na scolnan primario y sigui na educacion secundario”, el a agrega.

Sra. Fatme Faarup-Rigaud, un observador di e tayer ‘Educa cu Cultura’ a conta su experiencia di e tayer. El a indica cu durante e tayer nan a wak e situacion di con e cultura ta na Aruba, kico diferente hende ta pensa cu ta cultura y cu esaki a duna un bista di unda mester bay traha pa mehora den e parti di cultura. “Mi por bisa cu ora cu nos tabata bezig, e hendenan tabata duna nan opinion basta varia, cu ta duna tambe na e proyecto un bista di kico mester bay traha riba dje y kico mester specialisa un tiki mas den e parti di cultura”.

“E hendenan tabata hopi entusiasma y nan ta loco pa cuminsa traha riba e parti d cultura y mi a haya hopi great cu a bin diferente departamento di gobierno cu a participa y tur a duna un bijdrage super great. Nan ta pidi na final cu nan kier wak accion. Nan a haci un training pa accion. Y mi ta kere esaki ta e prome stap, e prome piedra pa nos bay engrandece cultura na Aruba”, el a agrega.