Diabierna siman pasa Parlamento a reuni pa determina e comisionnan y cua Parlamentario lo forma parti di nan. Segun Vrolijk, e proceso no a caba, pasobra no por determina ainda con e comisionnan lo mester ta hinca den otro.

E manera con Gobierno a forma e gabinete,ta nifica cu mester bin un ley di institucion ministerio nobo, LIM, pasobra ya e LIM actual no ta cuadra. “Eigenlijk lo nos mester bay na e sistema Hulandes, unda tin Ministerionan fiho. Na Aruba, unabez un Gobierno sinta, Ministerio A a bira C, D y a base di esey a habri.”

Pero en todo caso e comisionnan mes ta cla pa cuminza. MEP y Raiz a reparti su miembronan caba, mescos cu MAS y Accion21, cu ta facil mirando cu ta un miembro so e fraccion tin. AVP a pidi algun dia mas pa su miembronan scohe den cua comision nan ta drenta. Si tur cos ta bon, awe lo tin reunion di Comision Central pa determina e comisionnan y falta e ora e reunion publico pa formalisa esaki.

Manera ta e custumber den tur e añanan di Aruba como pais, miembronan di coalicion a tuma presidencia di tur e comisionnan. “Esey ta algo normative. No ta nada excepcional.” Vrolijk a bisa cu berdad tabatin drs. Marisol Lopez Tromp kende e biaha aki a argumenta pa permiti partidonan di oposicion haya algun comision, pero “e ta lubida cu nos tambe tabatey ora cu e mes tabata Presidente, a bib’e. Ora cu nos tabata kier por ehempel reunion cu Minister di Infrastructura e tema, e no tabata na Aruba y a manda bisa Griffier pa no tene e reunion, pasobra e no tabata tey.”

Vrolijk a bisa cu su forma di traha ta pa percura cu cada peticion drenta pa reuni cu Parlamentarionan y comisionnan, e lo manda esaki pa e Presidente di e comision corespondiente y sigura cu e encuentronan ta tuma luga. Esey lo ta e caso cu e Asociacion di Fysioterapistanan cu a entrega un carta na Parlamento. “E ta un decision di Gobierno pero mi kier scucha nan si. Mi ta bay yama e reunion di e comision di salud publico pa atende cu nan y nan lo mester yama e Minister. P’esey ma splica tur hende pakico nan mester acudi na reunionnan y bin trabou. Pasobra tin biaha tin reunion di comision y unicamente dos miembro ta presente. E comision mester ta completo. Es mas, ta hermentnan cu oposicion por usa bon. Pero nan no ta usa e hermentnan aki.”

En todo caso, Presidente di Parlamento Edgard Vrolijk ta comprometi pa e proceso Parlamentario cana bon y esey ta nifica sostene tur Parlamentario cu kier reunion. El a informa oposicion caba por ehempel cu e lo para nan tras si nan ta pidi reunion cu Minister of Gobierno. “Tanten cu ta pidi e reunion na e manera bon, mi no tin motibo pa par’e.” Como ilustracion e ta usa e rappel di fraccion di MAS, cu a bisa cu Prome Minister no a bin duna splicacion riba e asunto di werksternan di SKOA. “E no ta cuadra pasa, ta un stacion cu a pasa caba. Awor tin un Minister encarga y ta e mester yama. P’esey mi a manda bisa cu e rappel no ta conta mas, pero e Minister di Enseñansa si mester duna contesta.”

Landspakket y comisionnan

Parlamento di Aruba tin un rol grandi pa hunga den vota pa e Rijkswet Aruba Financieel Toezicht y tambe e Ley di COHO. Pero Aruba mes, Gobierno specificamente, ya caba ta mara na condicionnan di e landspakketnan, a base di cua a ricibi sosten di likidez. Y Parlamento lo haci su trabou, Presidente Edgard Vrolijk.

E landspakket ta mara na diferente fechanan cu mester logra obhetivonan y segun Vrolijk, no tin mucho retraso den e proceso aki. Locual si ta problematico ta cu Hulanda kier pa Aruba hala aden e recorte cu a duna den belasting y esey ta algo cu no por sosode, pasobra e ta dificil pa draai bek e reduccion di belasting. E recorte den AZV ta keda controversial y Edgard Vrolijk no ta mira con e por ta posibel pa corta sin haci daño na salud publico.

“P’esey mi a pone e tema como punto di agenda cu CAft, pasobra pa mi e no ta cla ainda pakico a yega na e suma di 60 miyon. Mi kier e argumentacion. Awor Aruba a corta 40 miyon y ami lo bisa cu nos ta riba e bon caminda, pero, ami tabata kier cu tabatin un plan multianual mescos cu ta e caso cu personal di Gobierno, unda ta cuminza cu un suma di salario cu mester baha, cuminsando na 35, pa despues gradualmente subi e recorte na 40 miyon. E ta mucho mas logico. Ami no ta de acuerdo, y atrobe Comision di Salud lo mester bira mas activo. Esey mi ta haya falta aki den Parlamento, esta cu comisionnan mester bira mas proactivo y yama Minister aden pa haya sa unda a corta y kico ta e plannan. E asunto di fisioterapistanan ta ehempel clave unda nan a mustra cu a avisa Minister di Salud di e situacion cu nan ta aden y di e balor di nan funcion. Pero awor ta e Comision di Salud mester yama e Minister aden.”