(Mercopress) – E Comision Investigativo Parlamentario di Brazil, CPI, ta sigui cu su investigacion pa determina con Gobierno di Brazil a maneha e pandemia COVID-19. CPI a anuncia e siman aki cu tin plan pa acusa Presidente Jair Bolsonaro y algun otro miembro di su gabinete di ‘crimen contra humanidad’ y hasta genocida contra habitantenan indigena di e pais.
Senador Renan Calheiros, kende ta papia na nomber di CPI a bisa cu e rapport final lo keda publica dia 15 di October proximo, y nan ta basa riba documentonan cu a logra obtenen di diferente ehecutivo publico, comerciante y testigonan.
Calheiros tambe a bisa cu cargonan lo keda presenta na Ministernan y otronan cu a actua den e ‘gabinete di odio’ unda a encurasha e uso di hydroxychloroquine contra COVID-19 mientras cu na banda tabata activo den otro maniobranan iregular den compra di material y remedi.
“Nos lo basa riba acusacionnan criminal, manera crimen regular, banda di e crimen di responsabilidad, crimen contra bida, contra humanidad y na e momentonan aki nos ta evaluando kico pa haci cu locual a sucede cu e comunidad indigena di Brazil y su genocida,” Calheiros a agrega.
CPI mes no tin podernan hudicial. Pero e conclusionnan lo por keda presenta na oficinanan di Procurador General di Brazil y na e Damara di Diputado cu por cuminza cu e proceduranan pa castiga y baha e Presidente di su funcion.
Pero, Presidente di e Camara di Diputado, Arthur Lira, un sostenedo abierto di Bolsonaro, no a autorisa pa habri e caso pa sanciona e Presidente, a pesar cu tin 120 peticion pa esey te cu awor.
CPI ta dirigi pa senadornan di diferente ideologia politico, pero mayoria ta oponente di Gobierno. Jair Bolsonaro a protesta e creacion di e CPI, cu a cuminza traha desde April. Su yiu, Senador Flavio Bolsonaro, ta dirigi un grupo di Parlamentario cu a bisa cu nan tambe lo publica un rapport di nan mes, paralelo na esun di e comision dirigi pa Calheiros.
E CPI a bisa cu ademas di Bolsonaro, tambe kier pa e Minister di Salud Marcelo Queiroga raporta na e comision denter di 48 ora cu ta vence awe. E mester bin duna cuenta riba e medidanan tuma pa vacuna na 2022. E Vice Minister di Salud Rodrigo Otavio Cruz a bisa cu e Ministerio falta recurso pa sigui cu e campaña di vacuna na 2022, particularmente pa aplica e di tres dosis contra COVID-19.
Queiroga a bolbe Brazil apenas Dialuna pasa, despues di a keda dos siman den cuarantena na New York, unda el a test positivo pa COVID-19. E Minister tabata riba e biahe Presidencial pa Asamblea General. CPI tambe a puntra e Minister pa splica pakico el a dicidi pa no cumpra mas di e vacuna Coronavac di China, cu ta fabrica na e Instituto Butantan na Sao Paulo.
Bolsonaro ta sigui cuestiona e eficacia di e vacunanan, y a bisa cu tin interesnan comercial tras di e curashamento pa propone cu vacuna mester bira obligatorio. E Presidente Brazilero a critica particularmente Coronavac, banda cu a sigui lanta sospecho cu China a crea e coronavirus den laboratorio como parti di un guera biologico. E crisis di COVID-19 ya a costa bida di como 600 mil Brazilero.
E fase di interogacion lo conclui awe, y Calheiros lo ahusta su rapport final, cu mester keda presenta dia 19 di October pa votacion e siguiente dia. E rapport mester di unicamente un mayoria simpel pa por keda entrega na Procurador General di Brazil y otro entidadnan responsabel pa supervisa accionnan di Gobierno. Tin como 30 persona, segun Calheiros, cu mester keda acusa cu crimen, pero e no kier a menciona e nombernan aki, pero a bisa si cu e lista ta encabeza pa Jair Bolsonaro mes.
