Hopi biaha nos ta mira crèche simplemente como un centro di cuido pa nos muchanan mas chikito; sinembargo, e crèche ta forma un parti integral y di gran importancia den e desaroyo y crecemento di un mucha, y esaki ta parti di loke a inspira y motiva Zulay Hernandez habri su mesun crèche.
Un cuido di mucha di gran calidad ta mantene un mucha sigur y saludabel, pero tambe ta sigura cu nan desaroyo ta tuma luga di e miho manera. Crèche ta unda un mucha ta cuminsa desaroya loke mas despues den bida lo yuda nan cu exito den scol, y bida social fuera di scol.
Aki ta unda e muchanan ta cuminsa siña interaccion social, pa motibo cu nan ta cuminsa siña expresa nan mes y nan necesidad. “Nos ta cuminsa siña e muchanan con pa comunica, pa medio di mustra nan e ehempel den nos y nos interaccion cu e demas muchanan,” Hernandez a expresa.
Ademas di comunicacion, tambe nan ta siña interaccion socialmente. “Pa medio di siña e muchanan comparti cu otro y motiva nan pa hunga cu otro y socialisa den un ambiente sano y controla,” e muchanan por desaroya socialmente, y asina crece cu un habilidad social cu lo yuda nan forma un relacion cercano cu familiar y amistadnan tambe.
Zulay a sinti den su curason un amor pa muchanan, y un kier pa yuda e muchanan y guia nan di e manera corecto, pa sigura cu nan futuro lo ta uno yen di exito den tur parti di nan bida, tanto socialmente como den nan educacion. Mas cu un luga unda el lo ofrece un alivio na e mayor y cuido di bon calidad na e muchanan, “mi kier a ta un guia cu lo yuda e muchanan aki desaroya di e miho manera posibel,” Zulay a expresa.
“Como juffrouw di un crèche, parti di e trabao tambe ta encera cuminsa guia e muchanan den conceptonan simpel y basico di bida, cuminsando for di con pa comporta, con pa papia, con pa expresa den arte y skirbimento, y te hasta con pa cuminsa conta,” el a agrega. Un crèche di bon calidad ta sigura cu un mucha lo tin un desaroyo efectivo, y sigur, den un ambiente cu ta controla y ekipa pa por provee e muchanan cu e materialnan necesario pa por apoya e desaroyo aki.
Un crèche no ta yuda solamente den e areanan menciona, cual ta di hopi importancia, pero tambe e ta yuda presenta e muchanan cu e concepto di ambiente, y e rolnan cu e personanan den esaki ta eherce. E ta cuminsa siña e muchanan tocante autoridad y igualdad, y e respet cu ta bini cu esaki, “pa motibo cu e muchanan ta siña cu tin un persona encarga, cual ta e juffrouw, y nan mester respeta e persona aki y e ordennan cu e persona aki duna.” Pa e motibo aki ta di gran importancia pa e crèche ta uno di bon calidad, cu personanan adecua pa ta encarga cu esaki, pa evita casonan unda cu ta mira abuso di autoridad of den cierto caso tambe un falta di esaki.
Respet na e persona cu autoridad ta di gran importancia, pero tambe e respet y consideracion na e otro personanan den e ambiente di e mucha tambe, na un crèche esaki lo ta e demas muchanan. Pero esaki ta bini dilanti na cas tambe, cu ruman- of amistadnan di e mesun edad. E mucha ta cuminsa siña cu “tur mucha ta di mesun importancia, y ta merece e mesun atencion y cuido, pero tambe ta siña cu tur mucha tin cu considera otro, respeta otro y comparti cu otro.”
Ademas di esaki, pa medio di e ambiente cu nan ta pasa aden na crèche, nan ta “cuminsa siña tambe tocante e structura di un dia na scol, of un dia en general.” E mucha ta cuminsa siña cu tin un tempo pa cada actividad, y pa descanso tambe, loke ta cuminsa prepara e muchanan pa e sistema di scolnan unda cu tin periodo di les na scol, y un pauze. Esaki ta un structura cu ta bini dilanti di manera similar na cas tambe, unda cu tin ora di hunga pero tambe ora di traha huiswerk, y despues di esaki tambe ta yega e ora di descansa na un ora adecua, pa asina prepara e mente y curpa pa e siguiente dia cu ta bin.
Como hende, nos ta siña di nos ambiente y e personanan cu ta rond di nos, y muchanan no ta excepcion di esaki. Pa medio di wak, tende, y ripiti, e muchanan ta siña con pa actua, papia y expresa, cual ta haci cu un ambiente sigur y controla ta ideal pa e comienso di un mucha su crecemento.
“Desde momento cu nos nace, educacion ta cuminsa tuma luga, y e ta algo cu ta sigui tuma luga henter nos bida. Esaki ta haci cu tur etapa di nos bida ta uno di un importancia sumamente halto, y por mas simpel cu un crèche por mustra, e ta forma un parti integro den e crecemento y desaroyo di nos muchanan.” Zulay a declara.
