Durante un conferencia di prensa dialuna atardi, FADA a anuncia oficialmente nan campaña di tur aña, ‘Siman di Bisti na Locura’. E aña aki e campaña ta celebra 9 aña y lo tuma luga durante e siman di 25 te cu 29 di october. Srta. Rulienne Arends, trahado preventivo di FADA, a duna mas informacion ariba e campaña aki.

E campaña ‘Siman di Bisti na Locura’ ta un campaña hopi conoci y gusta pa hopi den comunidad, specialmente bao di e mucha- y hobennan. Tur aña pa varios aña caba FADA ta forma parti di siman di cinta cora, un campaña cu originalmente a cuminsa na Merca na honor di un agente Mericano di DEA cu lamentablemente a fayece mientras e tabata yuda combati uso di substancia y traficacion di esaki.

“FADA ta purba di tur forma pa conscientisa nos comunidad, specialmente nos muchanan cu nos hobennan, ora cu nos ta papia di e topico di droga y substancianan legal of ilegal y mi tin di bisa cu e campaña di siman di bisti na locura ta uno hopi gusta”, Srta. Arends a bisa.

El a splica tambe cu recientemente FADA tabatin e oportunidad di sinta cu algun cabesante di algun scol, unda cu nan a informa tambe cu den e siman ey nan ta tuma e tempo pa papia cu e muchanan pa splica nan dicon nan ta formando parti di e siman di bisti na locura.

E siman di locura ta cuminsa dialuna 25 di october y manera tur aña, ta e dia di bisti un articulo cora. Diamars 26 di october, ta un e dia cu na peticion di hopi den comunidad a bin back y esaki ta e dia di peinado loco (crazy hair day). Esaki ta pa crea algo full diferente, un locura cu e cabey di e mucha. Dia 27 di october, un dia cu tambe hopi mucha gusta ta e dia di profesion di bo soño, cu ta duna e muchanan e oportunidad pa bisti na un profesion cu semper nan a soña. E siguiente dia, diahuebs 28 di october ta e dia di e meanan colorido of no usual. E ultimo dia, diabierna 29 di october ta e dia di un promesa positivo.

“Tur aña Merca ta scoge bao di e mucha-, hoben- of scolnan un lema ganador y e aña e lema ganador ta “Drug free looks like me”. Esey ta e lema di e aña aki y riba e diabierna nos kier pa nan crea un mensahe positivo usando e lema akinan”, Srta. Arends a splica.

El a informa tambe cu mescos cu tur aña e forma pa participa den e campaña aki ta pa un potret y upload esaki y aña pasa FADA a cuminsa haci esaki na un manera diferente. Pa participa mester subi e website di FADA, click ariba e logo di e campaña di ‘Siman di Bisti na Locura’ y asina lo ricibi tur e instruccionnan y por upload e potret. E team di FADA ta haya esaki y nan mes ta zorg pa e potretnan yega ariba e facebook page di FADA Aruba.

Srta. Arends a indica tambe cu tur aña e ta campaña aki ta creciendo y docente- of mayornan ta yama puntrando tocante e campaña di ‘Siman di Bisti na Locura’. “E ta un di e campañanan mas grandi y mas gusta di FADA y nos ta purba tambe di pone enfasis pa informa e muchanan e motibo pakico nan ta bisti un mea colorido, dicon nan lo bay scol un dia cu cabey loco of no usual y nos ta haya feedback di e docentenan cu nan ta tumando e tempo pa informa e muchanan dicon nan ta haciele y nos kier sigui encurasha esey tambe”.

Por ultimo Srta. Rulienne a invita e comunidad di Aruba pa participa den e gran campaña aki pa conscientisa y yuda combati e uso y traficacion di substancianan ilegal.