Serie di pregunta na Raymond Knops riba situacion na Aruba entre otro

Cua ta e pronostico pa recuperacion pa e paisnan CAS, Corsou, Aruba y St. Maarten? Esey ta djis un di e preguntanan cu presidente di e Comision Permanente di Tweede Kamer pa Asuntonan di Reino Jan Paternotte a manda pa Secretario Demisionario pa Asuntonan Interior y Relacionnan di Reino, Raymond Knops.

E preguntanan tin di haber cu e presupuesto presenta cu ta conta pa Islanan BES y tambe Relacionnan den Reino cu ta inclui provisionnan pa e paisnan CAS. Asina Paternotte por ehempel a puntra cua ta e nivel di onderstand na e islanan BES, tanto den cifra como den porcentahe den relacion cu sueldo minimo pa e ultimo cinco añanan y cuanto e lo conta pa hisa e onderstand na 70 porciento di e sueldo minimo legal, similar cu ta e sosten cu Hulanda ta duna.

Jan Paternotte kier sa si ta berdad cu tin plan pa traha facilidadnan di horeca riba y rond di e saliñanan di salo na Boneiro awor cu e concesion di Cargill ta caba y cua ta e rol di Gobierno di Hulanda riba decision pa futuro di e concesion aki.

Paisnan CAS

E Parlamentario Hulandes tambe kier sa si ta cera refineria Isla definitivamente y si esaki no ta e caso, ki papel Gobierno Hulandes tin riba un decision pa bolbe start e refineria y con ta tene cuenta cu e metanan di clima y salud di Corsou den e proceso. Cua ta e fondonan nacional y internacional cu Islanan BES pero tambe paisnan CAS por tin acceso na dje si ta trata di inversion den desaroyo duradero y bringa cambio di clima.

Cuanto ta e porcentahe di sushedad cu ta keda benta den dump y cuanto ta keda procesa, reusa y recicla? Paternotte a puntra pa cifranan detaya pa cada pais. Tambe kier sa cuanto y ta e casnan, empresanan y industrianan cu ta conecta na sistema di riool, specifica segun tipo y pa cada pais. Mas ainda, cuanto porcentahe di e awa cu ta bay lama ta sushi y dañino pa ocean. E Presidente di Comision permanente pa Asuntonan di Reino den Tweede Kamer kier sa di ki forma a pone atencion na innovacion riba tereno di sostenibilidad y e lucha contra cambio di clima den e landspakketnan.

Sosten humanitario

Riba e tema di sosten humanitario, Paternotte kier sa ki paso Hulanda lo tuma pa garantisa cu den henter e region Caribense di Reino Hulandes, esnan cu ta busca asilo lo haya acceso na facilidadnan adecuado y proceduranan di asilo cu ta den liña cu e tratado di refugiadonan di Nacionnan Uni. Kier sa si den e presupuesto pa proyectonan chikito den e Fondo di Proyecto (di Hulanda) a crea espacio specifico pa organisacionnan cu ta brinda proteccion y ta lucha na interes di derecho di refugiado y migrantenan.

Paternotte kier sa cuanto reunion tabatin di e comision di tratado di derechonan humano desde cu el a keda lanta na Augustus di 2020. “Con ta garantisa derechonan humano na momento cu ta traspasa migrante y refugiadonan den man di autoridadnan di Corsou y Aruba, desde cu a envolvi Koninklijke Marechaussee den e cuido di frontera.”

Jan Paternotte kier sa desde ki tempo lo tin medionan disponibel pa percura cu gruponan vulnerabel den e paisnan Caribense di Reino Hulandes lo sigui haya nan pakete di cuminda. “Ken ta considera grupo vulnerabel y ken no,” el a puntra. “Cua categoria di persona ta esnan mas afecta pa e crisis di corona.”

COHO

Pa loke ta e Rijkswet Caribisch Orgaan voor Hervorming en Ontwikkeling, COHO, Paternotte kier sa con esaki ta progresa y si ya caba a haci e gastonan pa 2021 cu tabata calcula na 607 mil euro. Pregunta ta cu si no a gasta e suma aki, si e ta pasa pa e siguiente aña. Pero tambe e Parlamentario di D66 kier sa ki dia e proposicion di ley di COHO ta bay Tweede Kamer. E tabata kier sa si e Secretario di Estado por indica cua ta e resultadonan te cu awor di e landspakketnan y e adelantonan riba e condicionnan pa e sosten di likides cu e paisnan CAS a ricibi. “Con ta traha na reforsa e habilidad di ehecucion administrativo riba e paisnan,” Paternotte a puntra.

Bao cua condicion lo bolbe duna prestamo pa cumpli cu e necesidad di likides financiero, Jan Paternotte kier sa, ademas di e cantidad y capacidad di personal ta rekeri pa lanta COHO.

Cumpli cu condicionnan

Siguiendo riba e tema di sosten di likides, e kier sa di Secretario di Estado riba kico a basa sumanan cu mester bay pa e tres paisnan, pa medio di COHO. “Con por mira esaki mirando cu ainda e ley di COHO no a pasa?”

Paternotte kier pa Raymond Knops clarifica cua ta e motibo pakico entre otro Aruba, pero tambe Corsou y St. Maarten tin problema pa cumpli cu e condicionnan pa e sosten di likides. E kier sa kico e paisnan mes ta bisa y con e Secretario di Estado a reaccion. “Di unda e ta mustra cu e paisnan tin problema pa cumpli cu e condicionnan pa e sosten di likides? Con halto ta e debenan nacional di Aruba, Corsou y St. Maarten y con por trece esakinan den proporcion normal atrobe.”

Paternotte kier sa cua ta e consecuencianan concreto cu e tres paisnan tin cu cumpli cu e condicionnan pa ricibi sosten di likides y kico e Minister pa Asuntonan Interior y Asuntonan di Reino ta haci pa yuda nan. Consecuentemente, e kier unda tin necesidad di experticio cu por brinda. “Cua y ki tipo di organisacion ta ricibiendo pago pa haci trabaonan riba instruccion, cu e meta pa promove bon gobernacion y yega na un finanzas publico saludabel? Ta trata aki di organisacionnan publico of companianan priva? Paternotte a puntra si ya a ehecuta e trabaonan y a paga pa esakinan.

“Gabinete ta pone entrante 2022, 12 miyon euro disponibel pa cada pais, of e ta e suma total pa tur tres, esta Corsou, St. Maarten y Aruba?” E Parlamentario di D66 tambe kier sa di con a reserva fondonan pa un prestamo pa Aruba y ta puntra kico ta haci posibel pa tur tres pais por ricibi financiamento na interes abao pa prestamonan cu mester paga na April 2022.

Fortificacion estado di derecho

Consecuentemente e kier sa si ta usa e medionan cu Hulanda a pone pa fortifica estado di derecho di e paisnan di Reino den Caribe pa bringa traficacion di hende. Y kico e resultadonan tabata caba den e proceso pa fortifica e estado di derecho di Corsou, St. Maarten y Aruba. “Cua ta e resultadonan concreto riba control di frontera y expansion di e maneho duradero pa para criminalidad?” E kier sa con ta para cu e financiamento di e TBO, cu ta Team Bestrijding Ondermijning, esta e ekipo pa bringa minamento di estado di derecho, na 2022 y despues. “Cu cua medio Hulanda ta sostene e tres paisnan den mantencion di ordo? Di cuanto placa ta papia aki.” E kier sa tambe di cuanto suma ta papia, y cua ta e areanan cu structural ta haya sosten financiero adicional, cu ta los di e fortificacion di e control di frontera y expansion di e esfuersonan pa bringa criminalidad en general riba den e tres paisnan. “Tin suficiente fondo pa bringa criminalidad organisa?”

Finalmente, Jan Paternotte a puntra ki otro daño tin cu e pandemia a causa, aparte di proyectonan posponi, costo di material y combustibel y caida den empleo.