Siman pasa, varios organisacionan local di naturalesa y otro organisacionnan a activamente participa den eventonan cu un enfoke riba cambio di clima. Cambio di clima ta extenso, rapido, y intensificando, y e actividadnan humano ta e causa primordial.
Influencia humano como resultado di desaroyo no sostenibel, manera e perdida of degradacion di areanan natural, ta creando evento climatologico extremo, incluyendo dianan mas calor, awasero torrencial, y temporada di secura mas frecuente y severo.
Un di e mihor maneranan pa combati cambio di clima ta pa planta palo y matanan nativo den un esfuerso continuo. Palo y matanan nativo ta forma e fundeshi pa ecosistemanan resiliente na cambio di clima y nan servicionan pa humanidad, cual ta e motibo cu varios organisacion local a unifica nan forsa pa haci Aruba uno mas saludabel door di accionnan pa restaura abundancia y diversidad di palo y matanan pa nan funcion ecologico. E accion aki ta uno specificamente pa substancialmente restaura ecosistemanan degrada y su biodiversidad. Ecosistema biodiverso ta ecosistemanan naturalmente diverso y saludabel pa bida. Cu e accion di planta palo y matanan nos meta ta pa hisa e biodiversidad di palo y matanan nativo, como resultado lo hisa e biodiversidad di bestianan salvahe, y tambe medio ambientenan mas saludabel y resiliente na cambio di clima. Cu esaki den mente dos actividad di planta palo y matanan a tuma luga den fin di siman como parti di e colaboracion cu a cuminsa na 2020 entre varios organisacionnan no gubernamental di naturalesa aki na Aruba.
Accion di planta na Parke Nacional Arikok
Riba dia 25 di september, nuebe especie di palonan nativo a wordo planta den Parke Nacional Arikok. E escogencia di especienan di palonan pa e evento aki tabata basa riba nan funcion ecologico of ta na peliger di disparce na Aruba, manera Supi/Asufro (Pereskia guamacho), cu solamente algun ehemplar den naturalesa. Tin un cantidad asina abou di palo y matanan nativo tin un impacto negativo riba e biodiversidad, salud di e ecosistema, y habilidad pa ta resiliente na cambio di clima. Durante e actividad di planta palo y matanan na Parke Nacional Arikok, rangers y team di maneho di Fundacion Parke Nacional Aruba, hunto cu partnernan di organisacionnan no gubernamental Ban Lanta y Planta – Trees for Aruba, StimAruba, y Aruba Birdlife Conservation, y bisiñanan di parke nacional, a traha hunto pa planta e palonan, haciendo e actividad aki un esfuerso comunitario bunita pa hisa e biodiversidad y ta resiliente na cambio di clima.
Accion di planta na Marinierskazerne Savaneta
Riba dia 26 di september a sigui cu un accion di planta mangel na Marinierskazerne Savaneta. E meta tabata pa hisa abundancia y diversidad di mangelnan na e costa di e base militar aki. Varios representantenan di Fundacion Parke Nacional Aruba, Ban Lanta y Planta – Trees for Aruba, y militarnan, a planta un total di 100 mangel, consistiendo di un combinacion di Mangel Preto (Avicennia germinans) y Mangel Blanco (Laguncularia racemosa) cu ta poco comun. Mangelnan ta hunga un rol crucial den cambio di clima door di ta hopi eficiente den captura carbon for di aire y proteha nos costanan durante mal tempo.
Union ta haci forsa
Hisa e abundancia di palonan y biodiversidad tin hopi beneficio pa naturalesa y e ser humano. Pa e motibo aki nos mester di henter e comunidad pa yuda haci Aruba resiliente. Planta palo y matanan local den bo hardin, participa den accionnan di planta palo y matanan, of simplemente muha matanan di mondi de bes en cuando. Parti di e colaboracion continuo entre e partnernan trahando duro pa haci e actividadnan aki posibel: Fundacion Parke Nacional Aruba, Ban Lanta y Planta – Trees for Aruba, StimAruba, Universidad di Aruba, y Marinierskazerne Savaneta. Cu e sosten continuo di boluntarionan y e comunidad nos lo sigui cu e esfuersonan pa haci Aruba un isla biodiverso y resiliente.
Pa mas informacion tocante e topico di cambio di clima y eventonan internacional binidero, bishita https://www.globalclimatechangeweek.net/climate-info.
