Manera por a anticipa, aña parlamentario a habri cu cierto ‘vuurwerk’, pero no di e nivel cu lo a desea. Ambos banda, tanto di gobierno y di oposicion, den tratamento di e nombramento di e actual ministro di Husticia y Asunto Social, y di su colega di Enseñanza y Deporte, a mantene un nivel di agresividad cu sigur lo a cobra aplauso di e fanaticada di ambos banda, pero e ciudadano mas neutral lo a puntra su mes, pa di tantisimo biaha, ta kico realmente nos ta gana cu semehante circo. Naturalmente tin esnan cu ta bisa cu esaki ta parti di e confrontacion politico, unda cierto asunto mester bin dilanti pasobra miembronan di parlamento ta desea di clarifica e asunto(nan) ey. En principio esey ta corecto tambe; parlamentario tin e derecho di cuestiona cierto asunto, y den e casonan concerni esey no ta otro. Pero mantene nivel den e encuentro ta un responsabilidad di ambos banda, y ambos banda a haci un trabao dudoso den esaki.

Aparte di e forma den cual e asunto a bay, e punto di principio cu a keda riba mesa ta: cuanto transparencia mester/por tin den caso di screening di ministro/politico, y kico ta aspecto cu si mester por divulga na publico general. Ta realmente ridiculo cu den un debate parlamentario mester discuti riba un si of no di divulgacion di un CV di un persona cu ta bay ocupa un di e puestonan mas halto cu e pais conoce. Ey no por tin nada di sconde y e persona(nan) concerni lo mester a tene honor na nan mes y duna esaki na publico, sin cu mester puntra pa esaki. Pesey no mester a warda ni riba e proceso di screening, esey no ta nada mas cu ‘goed fatsoen’, di tuma e ciudadano na serio, bisando pakico bo ta kere cu bo ta califica.

Por bisa cu den e caso di e ministro di Husticia el a haci un intento grandi pa mustra cu despues di e sucedido den su seno familiar, el a pasa varios biaha den screening pa su funcionnan oficial anterior y cu semper el a pasa esaki sin problema, tambe bao gobierno anterior cu awor tin su fraccion atacando e mesun persona; un punto fuerte na su fabor. E splicacion duna pa su colega encarga cu Enseñanza tabata menos convincente. Na su fabor e tin naturalmente e sentencia di Hoge Raad, cu a rechaza e apelacion di e empresa di auditoria, cu a haya un sentencia di Corte di Husticia unda ta conclui cu e empresa no a duna respet na e derechonan di e actual mandatario, y no a cumpli completamente cu e obligacion di ‘hoor en wederhoor’ den e investigacion cu a haci riba pedido di directiva di fundacion di loteria pa deporte na 2010.

Sin embargo, ta keda como hecho cu juez den Promer Instancia a duna permiso pa retiro di su persona, sin ningun compensacion salarial… Poco biaha nos sa mira caso asina den Corte unda juez ta sentencia retiro sin considera sikiera algun continuacion di salario, un claro confirmacion cu e juez tabata haya e retiro completamente na su lugar, mirando loke a trece dilanti di ambos banda. Den su consideracion, tambe despues di e peticion pa reconsideracion, juez a huzga cu e hechonan treci dilanti den e rapport di e accountant, no a keda, o no a keda suficientemente, refuta pa e ex-director di e tempo ey. Central den e rapport di accountant, di cual recientemente Bon Dia Aruba a haya copia, ta e caso di sumo nepotismo unda mas di 5 miyon florin di e fundacion a bay na obra y servicio suministra pa famia di e director, violando varios regla di bon administracion interno. Lesando esey, e sentencia di retiro ta bira mas comprensible.

Por cierto cu den e rapport aki ta bin dilanti e mesun practicanan cu nos por a constata tambe den e rapport reciente di e asuntonan dudoso den e caso di Refineria di Aruba NV, cu ta actualmente bao investigacion. Ta esaki ta e cosnan cu mester caba… E fayo den aplica su propio principionan di etica a costa e accountant un penoso sentencia di Hof y Hoge Raad, pero di otro banda ta keda e impresion di un mandatario cu den pasado no tabata sa bon con pa anda cu placa di otro.

En todo caso, despues di cu tur cos a keda bisa di ambos banda parlamentario, den palabranan menos adecua na cierto momento y birando hopi personal, ta logico cu ambos ministro lo continua nan trabao apenas inicia, y cu ta riba esaki ta importante pa huzga nan. Esey lo bay tarda un poco si, pasobra pa gobierno en general ta conta cu por lo pronto no tin plan ni presupuesto riba mesa, pues tampoco tanto asunto pa oposicion reacciona ariba. Esey talvez por duna espacio pa oposicion traha riba e cambionan di ley pa logra mayor transparencia den caso di screening, si asina nan ta desea. Esey tabata e desafio tambe cu Promer Ministro a vocifera na oposicion, a sabiendas cu e tin un mayoria parlamentario pa torpedea cualkier iniciativa opositor. Contal cu e mes aparentemente no ta mira necesidad pa mas transparencia den e asunto. Pregunta ta keda si e tabata pensa igual si e mes tabata den oposicion… Pero esey ta politica, semper.