(Reuters) – E presencia di miles di migrante, Haitiano den nan mayoria cu ta esunnan cu ta busca transporte caminda na nort cu Merca, ta pushando e personanan local di e ciudad costero Colombiano Necocli pa nan bandona nan cas, asina e residentenan a bisa ya cu e doñonan ta preferi e stranheronan cu ta paga cu dollar.
E acumulacion di migrantenan cu ta warda den e ciudad e poco luganan pa nan por wordo transporta cu boto pa e Selva di Darien na Panama -na unda e traficantenan ta guia e gruponan na pia- a aumenta na 19.000 despues cu e medida di ceramento di frontera pa motibo di pandemia a wordo elimina.
Aunke hopi migrante cu tiki placa ta drumi den tentnan of den e beach di e ciudad, otronan por huur un camber pa dia of comparti e casnan. Esaki a causa cu e residentenan permanente a bandona nan cas.
Huur e casnan of cambernan pa stranhero tin su bentaha, specialmente den memey di devaluacion di 11% cu e peso Colombiano a registra e aña aki contra e moneda Mericano.
“Tur e necesidadnan basico, coriente, awa, nan tin cushina na unda nan por prepara nan cuminda, ya cu ta hopi diferente cu esun di nos y tin baño” Francisco Mejia cu su famia ta huur cas pa migrantenan na 6 dollar pa persona a splica. Incluso e uso di negoshinan comercial tambe ta wordo recanalisa.
“Alrededor di 100 cas a wordo kita for di huurdonan local pa duna esey na Haitianonan y casi 50 negoshi comercial tambe a wordo kita of nan a kibra contract pa huur nan na Haitiano”, e personero di Necocli Wilfredo Menco a señala.
Agencia di Nacionnan Uni diahuebs ultimo a pidi pa cu paisnan no deporta e Haitianonan sin evalua prome nan necesidadnan y pa asina ofrece na nan e medidanan di proteccion pa cu nan por permanece legalmente, despues cu Merca a expulsa casi 4.000 Haitiano den ultimo simannan.
