Angelo Dirksz ta un hoben di 23 aña di edad cu recientemente a gradua di Ceolgio EPI, sector electrotechniek. Angelo a participa den e competencia di e proyecto ‘Pitch Time-Bario Edition’ y a resulta como un di e 11 proyectonan ganado cu su programa di 3D printing.

Den un combersacion cu Bon Dia Aruba, Angelo ta conta cu el a cuminsa cu 3D printing na aña 2019 ora cu e tabata pasando den un temporada hopi dificil y a cay den depresion. Danki na su miho amigo, cu a introduci Angelo na 3D printing, el a cuminsa namora mas cu 3D printing y despues tempo esaki a bira un gran hobby. E tin mas di seis luna ta duna les di 3D printing na e muchanan di YMCA San Nicolas y Dakota, y tambe a duna les na Colegio Pastoor Kranwinkel School.

E ta conta cu 3D printing ta mas cu un hobby, cu den e momentonan dificil cu Aruba ta pasando aden pa motibo di e pandemia, su hobby a yud’e financieramente tambe. Den e temporada di COVID-19 tambe Angelo hunto cu un grupo di 11 persona a print mas di 3000 face shields y a haci donacion di esakinan na e first respondernan. El a splica cu esey tabata den conexion cu un esfuerso global cu nan como hobennan di Aruba a forma parti di dje. “Esaki tabata un esfuerso global tambe caminda 3 miyon persona a uni mundialmente pa asina print un monton di face shields. Si un grupo di 11 persona a logra print mas di 3000, imagina cuanto 3 miyon persona por a print”, el a bisa.

Angelo ta conta cu e cosnan mas comun cu e ta print yama lithophane, locual ta un memoria di un potret cu e ta print y haci permanent den por ehempel un luz pa anochi. “E bunita di 3D printing ta cu el a cuminsa manera djis prototiponan, unda cu negoshinan cu kier a traha un producto pero nan no tabata sa con e ta, nan tabata 3D print e y asina nan ta wak si di berdad e ta traha”, el a splica. “Cu tempo esaki a bira mas conoci y aworaki hasta ta print raket, cas di hende, print por ehempel curazon y cerebro pa les di biologia pa e muchanan por wak y experiencia di berdad kico nan ta papiando di dje den lesnan. E ta bayendo masha leu mes”.

Angelo a participa den e competencia di proyecto “Pitch Time-Bario Edition” caminda su proyecto di 3D printing a resulta como un di e 11 proyectonan ganado di e competencia. E ta conta cu su proyecto di 3D printing ta eigenlijk pa yuda haci e muchanan di Aruba creativamente independiente. “Cu 3D printing bo por usa cosnan practico cosnan cu bo por usa na cas manera por ehempel hangers, of den mi caso personal durante e pandemia ora mi cranchi di baño a daña mi a logra 3D print un cranchi nobo sin mester a bay cumpr’e un otro caminda, dus e por bay den cualkier direccion cu bo kier”, el a bisa.

“E idea di e proyecto ta pa yuda e muchanan compronde nan mes y pa nan por cuminsa expresa nan mes den un manera nobo tambe. Y tambe e idea cu e proyecto aki ta cu den tempo e muchanan lo custuma mas y cu 3D printing lo haci cu nan lo por traha un producto cu nan lo por bende y ora esaki bende e muchanan mes cu a participa den e proyecto lo haya un porcentahe y nan lo ripara cu si nan tuma un tiki di nan tempo pa desaroya un talento of un habilidad ta haci cu esaki por yuda nan hasta afo di scol. E bunita di esaki ta cu e por yuda bo na cas, na scol y hasta den bo bida profesional”, el a agrega.

E ta conta cu for di e momento cu el a siña di 3D printing ya caba su vision tabata cu den 10 aña casi cu tur cas lo tin un 3D printer y cu den dos aña tur scol lo tin un 3D printer. “Mi pensamento ta cu den dos aña tur scol lo tin un 3D printer y un departamento cu lo mustra muchanan con pa 3D print, con pa 3D design y asina trece un comunidad nobo na Aruba cu nos por gewoon bira makers en bes di bin cu cos di afo.”, el a bisa,

Por ultimo Angelo mesnahe pa comunidad, specialmente pa hobennan ta; “Basa ariba mi mesun experiencia, cu mi wordo cualifica manera mentalmente handicap den basis, mi kier bisa cu un label no ta defini ken bo ta como persona, cu determinacion y confiansa den bo mes bo lo logra tur e metanan cu bo tin”.