Den nomber di Gabinete Wever-Croes II y Minister di Asuntonan di Adulto Mayor, Minister Ursell Arends diamars atardi a anuncia cu Gobierno di Aruba ta decreta luna di October como luna di Adultonan Mayor. Dia prome di October, ta Dia Internacional di Adultonan Mayor y cu e decreto aki, Aruba lo celebra esaki durante henter luna di October.
“Den e proximo 4 añanan, Ministerio di Adultonan Mayor lo traha duro pa asina duna e mas di 25 mil adulto mayor den nos comunidad pa garantisa un miho calidad di bida y sigui traha den bon cooperacion cu tur instancia cu ya caba ta trahando den e veld pa logra e meta aki”, Arends a enfatisa den un comunicado di prensa.
Arends a remarca cu e decision aki sigur ta un honor tambe na tur instancia y fundacion cu ya caba ta haciendo e trabao pa garantisa bon cuido y trato pa nos adultonan mayor. Pa cu esaki, Arends ta felicita y alabes duna danki na cada un di e instancianan y fundacionnan aki y cada persona cu ta traha duro pa e adulto mayor. Pabien tambe na tur nos adultonan mayor y danki pa ta esnan cu a yuda construi nos pais.
“Ban celebra hunto den e luna nos dilanti dedica na nos adultonan mayor y duna nan e amor y tempo cu nan merece. Aruba ta di nos tur y nos adultonan mayor por conta cu Gabinete Wever-Croes II y e ministerio cu ta bao mi encargo lo traha duro na bienestar di cada un di boso”, Minister Ursell Arends a expresa.
