(CuraçaoChronicle) – Alfonso Trona, director di Departamento di Impuesto di Corsou, a reporta fraude na 2019. Tabatin iregularidad cu pago di reembolso di impuesto y premie.
Segun minister di Finanzas di Corsou, Javier Silvania, tin dos acusado di fraude cu ta vincula na team di baseball Sta. Maria. Ta bisa cu e empleadonan tin vinculo cu su predecesor, Kenneth Gijsbertha. E tabata presidente di e Sta. Maria Pirates pa un tempo largo.
E minister a indica cu dos hungador di baseball tabata contrata pa traha na Departamento di Impuesto sin pasa e procedura di seleccion. E minister a declara esaki durante su intervencion den parlamento diamars. Parlamento a reuni pa discuti e descontinuacion di pago cash na Departamento di Impuesto.
E cinco persona involucra a comete fraude 33 biaha. Ta trata di 381,410.92 florin cu nan a deposita den un cuenta di terceros. Intencionalmente, a duna un number di cuenta di banco incorecto na e accountant di Departamento di Impuesto, y como resultado di esaki a deposita e placa ilegalmente.
Di e cinco sospechoso, un tabata un ambtenaar, dos contratista di gobierno, un empleado na Banco di Seguro Social (Svb) y otro tabata un contratista na Svb.
E agente di polis trahando riba e caso aki tabata suspendi. No tabatin ningun otro persona cu por a tuma over e investigacion. Silvania a indica cu awo ta examinando si tin agentenan cu por continua cu e investigacion. E minister si a indica cu empleadonan ya tabata sospechoso of eligibel pa aresto. Pa motibo di falta di evidencia, a laga algun di nan den libertad.
