“Nos ta spera cu EPI lo por adapta su curiculo mas lihe posibel na e exigencianan di calidad di awendia y nos ta spera cu e ora ey, e relacion entre Dr. Horacio Oduber Hospital y EPI lo sigui riba bon pia.” Asina Director di HOH Jacco Vroegop a bisa Bon Dia Aruba riba e hecho cu a dicidi pa no continua cu EPI . “Te ora cu esey ta cla nos lo busca hende di institutonan di formacion.”

Den otro palabra, Hospital ya no ta warda mas riba EPI y lo traha hunto unicamente ora cu e cambionan keda concretisa. Y e cambionan ta na caminda. Pasobra EPI ta preparando pa introduci e sistema Hulandes, adapta pa e situacion na Aruba.

Na 2020 entrega un proposicion pa proyecto di renobacion di programa na e Plan Strategico Nacional, pa asina entre otro pa introduci e HKS na Aruba en bes di e BOL/BBO pa enfermeria. A Informa Directiva di HOH na Maart cu ta pendiente e decision. Na Mei, a bira conoci cu EPI lo tin fondo pa renoba 12 programa, cu ayudo di CINOP di Hulanda .CINOP ta un organisacion social cu experticio den desaroya programanan di siñamento, programa di training y yuda cu desaroyo particularmente di estudionan vocacional y tambe enseñansa inclusivo.

Seriedad

Pero e notificacion a drenta mucho laat pa HOH, segun Director General di EPI, Ryan Maduro. “HOH a cuestiona si tin seriedad na EPI. Seriedad ta nifica compronde unda recursonan ta, ki limitacion tin y unda ta aloca nan. Y mi ta kere cu un partner cu ta dispuesto pa traha cu EPI lo a compronde esey. A informa nan na 30 Juni y a recomenda pa sigui cu e vakschool constructie pa un aña mas, pa introduci e HKS manera HOH kier na Augustus 2022.” Maduro a bisa cu e tabata bao impresion cu HOH a compronde. “Pero un luna despues Jacco Vroegop ta manda carta cu e ta kibra e contracto pa e vakschool constructie. Y den menos di cuater ora Rudy Lampe ta manda carta cu e ta lamenta cu EPI no ta dispuesto pa cambia. Ningun momento nos a haya un yamada pa puntra kico a pasa. Y eynan nos a keda.”

Trabao pa trayecto nobo ta sigui

A papia cu Minister nobo di Enseñansa, kende a scucha e ponencia di EPI, y Dialuna a papia cu Minister Oduber di Salud Publico. “Ami ta sali di e punto di bista cu e trayecto ta sigui.”

Locual Maduro ta haya inaceptabel cu Jacco Vroegop ta declara na Amigoe cu ya HOH no ta bay tuma graduadonan di EPI na trabao. “Pero nan ta traha si cu nos studiantenan cu mester core stage. Y nan a indica cu nan ta sigui brinda espacio pa nos stagiairenan. Pero cu nan no ta bay tuma e mesun stagiairenan aki cu despues ta gradua na trabao, ya cu ta prefera di bay busca na Hulanda. Kiermen cu graduadonan Arubiano no lo por haya trabao na hospital?”

Pero Ryan Maduro no ta kere cu mester cera porta. “Aunke cu nan a tira nos cu lodo, nos ta keda habri pa sigui dialoga. Nos nunca a nenga cu nos programanan ta bieu. Mi ta haya duele, pasobra si HOH ta kere cu ta ataca EPI, ta e studiantenan nan ta haci daño. Pasobra awor studiantenan tin pregunta caba, si nan lo tin trabao ora di gradua. Nos ta den un crisis y ta esaki bo kier pa bo pais? Si ta trahando den un realidad cu tin recursonan limita, mester traha creativo y conhunto, pa compronde e posicion di otro y hunto busca solucion. Nos lo keda cu nos ruta. E renobacion ta sigui na Augustus 2022 den e modelo HKS. Ta esey mi por ofrece. Mi mester a pidi yen di dispensacion pa docentenan haya oranan adicional pa contextualisa y traha maneho nobo, cu tur ta tuma oranan largo. Trece un programa nobo, no ta manera djis hisa un switch,” Maduro a conclui.

Hospital tin responsabilidad pa brinda calidad

Pero segun Freddy Gumbs, Coordinado di Organisacion y Desaroyo na HOH, “pa añanan largo ta pidi EPI pa bin cu un calidad segun e dunado di trabao. E nivel no ta locual HOH mester y cada aña ta cana atras y tur aña e exigencianan di cuido ta subi. Y si nos (red. HOH) no haci e extra esfuerso, nos no por usa nan mesora den cuido di pacient.”

Gumbs a enfatisa cu HOH kier pa studiantenan di EPI drenta hospital pa sigui nan carera. Despues di dos aña riba piso mes nan lo por sigui nan carera como enfermero specialisa, y tur e cursonan ta HOH mes ta financia, mescos cu e tempo. Pero e nivel basico como enfermero mester ta na nivel. “Y nos a purba di trece esaki hopi biaha na atencion di EPI pero e mester keda poni den practica si y esey no ta sosode. Esey lo ta e razon cu nos Directiva a bisa cu te aki ta yega.”

Gumbs a bisa cu kier sigui cu EPI, cu ta e unico programa pa enfermero riba e isla. “Pero e calidad mester ta bon si, y como dunado di trabao bo mester por exigi esey. E pacientnan cu ta bay drenta aki mester di e cuido cu ta mas miho y esey ta e responsabilidad cu HOH tin cu pacientnan. Mi kier ta hopi cla Mi tin bon cooperacion cu EPI. Nos kier pa Aruba tin e miho cuido cu ta posibel. Nos lo kier traha cu EPI pa esey. EPI tin e responsabilidad legal pa entrega enfermeronan y nos ta consciente di esey tambe. No ta cu nos no kier colaboracion, sino cu e calidad mester ta bon.”

Jacco Vroegop tambe a reitera cu kier sigui cu EPI den futuro pasobra kier enfermeronan di Aruba mes cu conoce e idioma, e cultura y ta keda traha mas largo na hospital. “P’esey mes HOH ta inverti awor den educacion den cas mes pa asina duna mas hoben e oportunidad pa bira enfermero. E programa cu HOH ta brinda ta organisa hunto cu un instituto di formacion di Hulanda cu si ta cumpli cu e exigencianan di calidad.”