Un biahe di trabao na New York como parti di delegacion di Reino cortico, bastante intenso pero tambe hopi importante specialmente awo cu Aruba ta recuperando di e Pandemia”, Prome Minister Evelyn Wever-Croes a expresa mientras cu el a duna un resumen completo di e reunionnan di dos dia na New York. Lamentabel si ta, cu durante su ausencia oponentenan a causa bastante conmocion riba e hecho cu el a biaha.
“Mi a tuma nota cu tabata tin algun conmocion riba mi ausencia di dos dia di oponentenan y tambe riba ausencia di dos colega Minister cu a biaha pa motibonan priva, esta Minister Ursell Arends y Minister Geoffrey Wever. Mi mester bisa cu e coleganan cu a biaha pa motibonan priva of pa vakantie ta cosnan cu nan tin derecho riba dje. Nan ta hende y ta yega momento cu mester un break pa bo por recarga y sinceramente mi ta spera cu mi tambe por haya e chens ey di tuma algun dia liber pa por recarga mirando cu e temporada tras di lomba tabata uno hopi pisa y tenso sin paracion y sin descanso. Nos ta Minister berdad pero esey no ta haci nos inhumano”, Prome Minister a enfatisa.
Wever-Croes a indica cu Articulo 8 di reglamento di ordo di Conseho di Minister ta stipula cu ora un minister biaha of ta pafo di Aruba, e ta notifica Gobernador pa cuanto dia y unda e ta bay. Pues ta informa Gobernador di e biahenan sea priva of di trabao. Aparte di esey a dicidi cu ta informa Parlamento ora di haci un biahe pa exterior pa motibo di trabao.
“Den pasado tabata informa Parlamento ora ta trabao y priva pero cierto parlamentarionan di fraccion di AVP no tabata tin e madurez suficiente pa por a procesa e informacion y tabata haci weganan infantil cu esey. Nos a bay back na e reglamento di ordo y nos a mira cu miho nos ta duna Parlamento informacion cu Parlamento mester cu ta biahenan di trabao cual den mi caso mi a haci. Esey ta e situacion y mi ta lamenta cu el a causa conmocion. Banda di esaki laga nos corda cu cada minister ta hende y nos tambe tin mester leu a leu di tuma un break, vakantie of bay den exterior pa regla cosnan priva”, Prome Minsiter Evelyn Wever-Croes a enfatisa.
