Recientemente Minister di Turismo sr. Dangui Oduber a reuni cu e CEO di AHATA sra. Tisa LaSorte. Esaki tabata un reunion cu e minister a coordina cu CEO pa asina elabora y comparti e maneho y vision di ministerio di turismo.
Tambe pa alinea e pensamentonan den e direccion cu turismo mester bay den e siguiente 4 añanan. Segun un comunicado di gobierno, tabata un combersacion hopi ameno caminda a intercambia riba e liña di maneho di ministerio y tambe kico ta e preocupacionnan primordial di parti di AHATA. Den cuadro di esaki a haci palabracionnan concreto di con ta bay traha mas di cerca cu otro.
Oduber a informa AHATA cu e maneho y vision di e proximo 4 añanan di dirigi riba mehoracion di producto Aruba. Busca brandnan di calidad hopi halto, crea un balansa entre e desaroyo economico, medio ambiente y naturalesa. Pero tambe percura pa diversifica nos turismo, den esaki Oduber a comparti cu AHATA cu su persona lo kier mira mas diversificacion den e mercado Mericano. Mester pensa mas riba West Coast y estado manera Colorado, mas diversificacion den e mercado Europeo tambe. AHATA tambe ta comparti e mesun pensamento pa cu diversificacion di e mercadonan.
Oduber a combersa tambe tocante cu mester eleva e nivel di servicio cu Aruba ta brinda na nos turistanan. Un di e puntonan di preocupacion cu AHATA a trece dilanti ta e situacion di UTV y ATV cu nan manda varios recomendacion caba pa Gobierno. Oduber a informa e CEO cu ya caba Gobierno ta considera esaki un prioridad pa atende cu e UTV y ATV pa asina por conserva y proteha nos naturalesa na e mihor forma posibel.
Oduber a papia tambe tocante nos aeropuerto y proyecto “Gateway 2030” y tambe di e proyecto di “Port City” cu ta un proyecto hopi importante pa nos desaroyo economico.
Oduber ta haya cu e reunion tabata uno hopi fructifero y a haci palabracionnan cu lo tene e reunionnan aki mas frecuente pa asina e liñanan di pensamento keda alinea. Pa asina e desaroyo di nos turismo cu ta nos unico pilar economico y nos industria di mas importante. Ta p’esey tambe ta instrumental pa Oduber tin un bon relacion di trabou cu AHATA y ta contento di con e ultimo 4 añanan a bay y ta looking forward pa traha hopi di cerca cu otro, segun e comunicado ta finalisa.
