Acuerdo riba RAft ta brinda e posibilidad pa busca financiamento via structura PPP atrobe

Aruba lo tin contesta definitivo riba refineria denter di seis luna. Netamente pasobra mester tene cuenta cu medio ambiente, tin cu ta cauteloso con ta sigui cu e proyecto di refineria.

Asina Prome Minister Evelyn Wever Croes a bisa Bon Dia Aruba.

Progreso economico ta importante pa bienestar di ciudadanonan. Y Aruba a experiencia progreso economico grandi, pero sin cu a maneha su impacto riba medio ambiente y infrastructura. E consecuencia ta cu awor ta sinti e impacto riba calidad di bida.

Ehempelnan clave ta e dump di Parkietenbos, e planta di purificacion di awa, RWZI, na Bubali y e molester di UTV. “Riba e area di dump, den e ultimo añanan nos a perde tempo valioso na busca solucionnan cu talbes tabata mucho grandi pa Aruba. Den e par di lunanan cu mi tabatin encargo cu e ministerio, nos tabata buscando solucionnan pragmatico, chikito cu a lo largo, berdad lo costa mas, pero a termino corto ta locual por paga. Y riba dje, tabatin e prohibicion di Hulanda pa presta placa y cera Proyectonan Priva Publico, PPP’s cu ta e forma pa soluciona e problema di dump. Dus no por a bay ni pariba ni pabao.”

Pero, segun Evelyn Wever Croes awor si tin posibilidad pa financiamento. “Nos a yega na un areglo cu Hulanda riba e Rijkswet Aruba Financieel Toezicht, RAft. Den cuadro di e RAft ta posibel pa presta of cera PPP’s atrobe, pero na forma responsabel. Dump. RWZI y e prison na San Nicolas lo cay den e proyectonan aki. Tin solucion ta na caminda,” Prome Minister a bisa, señalando cu e Minister encarga cu dump y RWZI lo ta Ursell Arends.

UTV

Evelyn Wever Croes a institui un comision priva-publico bao guia di DOW pa atende cu e problematica di UTV. E comision tin su recomendacion cu a keda presenta na Prome Minister siman pasa. Awor Conseho di Minister mester trata e recomendacionnan.

“E rapport ta responde na e pregunta con ta elimina of baha e impacto negativo cu e vehiculonan aki tin riba naturalesa. Nos a purba di papia, nos a purba di conscientisa hende, pero e no a yega. Nos mester bay mas leu.” Segun Evelyn Wever Croes, mayoria di e vehiculonan aki no ta sirbi pa core riba camindanan publico. Lo mester tin un area asigna pa nan. “E lo causa mas daño den e area ey, pero tin biaha mester sacrifica algo chikito pa scapa algo mas grandi. Falta pa sinta cu e doñonan di curpa pa informa nan y pa despues bay Conseho di Minister otro siman pa tuma decision riba e tema. E meta ta pa busca un balans entre e negoshi cu e actividad aki ta genera, pasobra tin turista cu tin hopi interes. Den curso di dos siman lo tin mas informacion,” mr. Wever Croes a splica.

Refineria

Un di e actividadnan cu mas ta contribui na cambio di clima ta industria cu ta usa ‘heavy fuel,’ manera carbon y petroleo. Pero refinerianan ainda tin un papel importante pa hunga den economia y pa brinda siguridad laboral na comunidadnan. Na Aruba tin hopi aña ta busca pa bolbe habri e refineria. Pregunta ta si esaki ta posibel, particularmente den luz di e SDG’s cu ta pidi pa un ambiente mas saludabel.

Pa tal motibo mes, Prome Minister Wever Croes a bisa cu aki seis luna lo tin un contesta definitivo riba futuro di refineria. “Ami a cuminza e proceso den un forma transparente, cu un destaho publico y nos ta bay finalis’e. Nos no por warda mucho mas. Mescos cu tur actividad, mester tin balans. Mester crea cupo di empleo pa hendenan tin entrada digno, e ta crea bienestar, ta baha presion financiero. Pero di otro banda, e no por bay a costo di tur cos.

Ta pa e motibo ey nos no ta cla ainda. Pasobra si kier a busca cualkier refineria cu ta sushi, e lo por tabat’ey caba.” E Prome Mandatario di Aruba a splica cu ta pasobra ta buscando un proyecto cu ta cumpli cu standard ambiental cu ta cumpli cu exigencianan “cu nos a pone pa nos mes, por ehempel no kier molina di biento cerca di cas di hende, nos no kier un refineria cu ta causa daño na salud di hende. Ta pasobra nos buscando algo ‘state of the art’ e ta tardando. Pero nos ta pidi e Minister nobo (red. Glenbert Croes) pa finalisa e proceso den seis luna pa despues dicidi con ta sigui.”

COHO

Pregunta ta si e proyectonan riba sostenibilidad lo por conta cu sosten di COHO cu segun Hulanda lo tin fondo pa haci inversion. Pero Prome Minister no ta mucho optimista riba e punto aki pasobra e no tin indicacion cu COHO lo haci esaki. “Mi no ta kere cu COHO lo bay yuda, y den landspakket no tin nada para pa medio ambiente. Pero nos ta OK cune.”

Motibo ta cu Aruba tin su mesun plan maestro cu si ta inclui maneho ambiental, energia cu ta inclui e refineria. A traha e master plan den forma alinea cu e landspakket.

“Mi no ta kere COHO ta bay saca nos di e problemanan aki. Nan a duna e impresion ey, pero mi no ta kere. Locual si nan ta haciendo ta invertiendo den estudionan . Si mester haci estudio, nan ta trece un grupo di experto di Hulanda y nos mester haci e resto. Mi ta contento cu estudionan cu nan ta haci. Pero realmente esakinan ta asuntonan cu nos mes mester soluciona.” Pa e motibo ey mes Prome Minister ta contento cu e RAft, bao palabracionnan concreto, ta a crea posibilidad pa busca financiamento, pero bao nan supervision.