(ElNacional) – Nicolas Maduro a expresa diasabra su deseo pa alcansa acuerdonan nobo den e tercer ronda di dialogo cu oposicion na Mexico, cu a cuminsa un dia laat debi na declaracionnan di Erna Solberg, Prome Minister di Noruega, pais mediador, dilanti ONU, den cual el a manifesta su preocupacion pa e derechonan humano na e nacion Caribense.
Dilanti e postura chavista pa no sigui e negociacionnan te ora cu tabatin un splicacion, e delegacion di Noruega a afirma su imparcialidad den e proceso y ta lamenta cu e declaracionnan di Solberg lo por interveni den e confiansa di nan rol den e dialogo.
“Nos ta lamenta cu e declaracionnan reciente na ONU por afecta e confiansa den nos papel. Ta fundamental cu e proceso y negociacion ta entre e Venezolanonan sin ningun interferencia indebido”, Nylander a expresa na prensa.
Despues di e mensahe di e mediador Noruego, e representante di e delegacion chavista, Jorge Rodriguez, a splica na e periodistanan na Mexico cu a resolve e situacion caba.
“Nos tabata wardando pa situacion aki por a wordo soluciona pa asina por a reanuda e proceso”, Rodriguez a bisa, tambe president di e Asamblea Nacional di Venezuela.
Unabes e inconveniente a keda soluciona, Maduro a manifesta riba su cuenta di Twitter cu e ta spera di e proceso di combersacion- y debatenan aki acuerdonan positivo pa e pais Sur Americano.
“Un biaha mas nos delegacion ta yega Mexico pa continua cu e dialogo cu e oposicionnan Venezolano. Den un proceso di combersacion- y debatenan, di cual nos ta spera acuerdonan nobo y resultadonan positivo pa e pueblo Venezolano”, e mandatario a skirbi.
