Den un entrevista pa Bon Dia Aruba, Jennifer van der Biezen, un hoben agente di real estate ta duna splicacion di e curso ‘Mindset Reset’, un curso cu el a cuminsa basa ariba su mesun experiencia y cu ta enfoca ariba topiconan manera inversion propio, amor propio y motivacion.

 

Jennifer ta splica cu e idea pa cuminsa cu e curso ‘Mindset Reset’ a nace door di experiencia propio ya cu pa varios aña e ta duna un curso cu yama ‘Successful Real Estate Selling’. Mirando su pasion pa duna curso y siña, el a cuminsa tuma diferente tayer den exterior y asina el a cuminsa ripara cambionan grandi personalmente .

“Mi semper tabata encanta duna y tuma cursonan. Den e delaster añanan, mi a bula bay Los Angeles varios biaha pa tuma tayernan di Top Entrepeneurs y Coachnan manera Lisa Nichols (The Secret), Tom Bilyeu (Impact Theory riba Youtube), Jay Shetty (Famoso Monk riba Facebook y Instagram) y mucho mas”, el a bisa.

“Ora mi a cuminsa aplica tur e hermentnan cu mi a siña, mi a observa un cambio masha grandi mes. Mi a keda asina impresiona, cu mi a dicidi di trece tur e hermentnan aki dilanti, den e curso ‘Mindset Reset’ pa cualkier persona cu tambe kier inverti den nan mes y experencia un cambio grandi, por haci esaki na Aruba mes”, el a agrega.

Jennifer ta splica cu e curso ‘Mindset Reset’ ta pa personanan di 18 pa 70 aña di edad, e ta 6 siman largo unda cu ta toca diferente temanan manera por ehempel, con pa domina bo mente, y no laga bo mente domina bo, y tambe, con pa tuma accion, hasta ora bo tin miedo. “Nos ta papia tambe hopi over di motivacion y con pa cambia pa e motivacion cu ta mas duradero. Un di e lesnan mas gusta, ta e lesnan dedica nan con pa stima nos mes, con pa kere den nos mes y pone nos mes na prome lugar. Esaki ta e secreto di e persona nan exitoso, cu ta core tras di nan meta nan sin wak atras”.

E ta indica cu e temanan cu semper ta resalta hopi ta amor propio y con pa aumenta autoestima mas liher cu ta posibel. E ta splica cu door di tin un autoestima halto, un persona por logra su metanan mas liher. “Dicon? Paso nos no ta wordo afecta facilmente door di critica negativo y obstaculo nan inespera. Persona nan cu un autoestima halto tin e curashi di core tras di nan soño nan, sin importa kico otro persona nan ta pensa di nan”, el a bisa.

Jennifer ta expresa cu e tin como meta principal pa yuda e personanan cu e hermentnan necesario pa nan logra dirigi nan mente den e direccion cu nan ta desea. E ta conta cu door di observa personanan exitoso, el a realisa cu e personanan aki no tin miedo di tuma risico ni di comete algun eror na caminda. “Pues, e curso ta duna bo e receta con pa core tras di bo soñonan, sin cu e miedo ta domina bo y sabotia bo”.

El a splica cu su enfoke ta pa ‘dig deep pa busca en realidad kico nos kier di berdad. Den e sentido di cua meta nan lo haci nos feliz y cu ta bale la pena. Unabes nos logra descubri e meta nan aki, e hermentnan lo yuda duna e extra push pa haci e meta nan un realidad. Apart di logra metanan, e hermentnan ta yuda bo sinti bo completo, cu bo ta na paz cu bo mes y cu bo por depende completamente riba bo mes emocionalmente’, el a agrega.

Di experiencia propio e ta splica cu e no tabata satisfecho y tabatin un autoestima abao, pero na e momento cu el a tuma e decision di inverti den su mes, su bida a cambia completamente. “Mi a durf di tuma hopi oportunidad nan cu antes tabata invisibel pa mi. Ora di papia di inversion, nos ta wordo encurasha pa inverti den material, pero e mihor inversion, ta den nos mes. Inverti den bo mes awe y disfruta di e frutonan”, el a bisa.