Maneho di energia, y principalmente e ruta pa yega na un sistema mas sostenible di produccion y uso di energia (electrico) den e proximo añanan lo exigi bastante atencion. Na e momento aki no ta conoci ainda kico exactamente e plannan gubernamental lo encera, pero lo ta logico cu esakinan lo indica un of otro forma di yega na elimina uso di combustible fosil pa genera energia. Esaki teniendo como meta pa yega finalmente na elimina – casi completamente – e uso di combustible fosil y pasa pa uso di forma(nan) di energia renovable. Te na e momento aki a logra bao di diferente gabinete parcialmente haci e cambio aki, cu e instalacion di e parke di molina na Vader Piet y proyectonan solar na aeropuerto y tereno di refineria, cu por garantiza un poco mas di 20% di e consumo diario, riba dia cu tin biento. Y despues… pregunta y poco contesta.
A scoge, durante e gabinete saliente, oficialmente pa tuma uso di gas natural como forma intermedio di uso di combustible fosil como fase transitorio, deshaciendo di uso di heavy fuel oil (HFO) y usando gas natural como un combustible menos dañino, aunke ainda di origen fosil. Esaki ta ainda den e fase di ‘promesa’, cu su problemanan di yega na concretizacion. Den e proximo tempo lo mester bin mas claridad den e tema aki, mientras e problemanan ta mas grandi cu loke ta aparenta di loke nos ta haya tende di banda oficial. Aruba, pa loke ta suministro di gas natural, ta loke na Hulandes nan ta yama ‘ te groot voor servet en te klein voor tafellaken’. Den ultimo añanan a logra diversifica e tamaño y formanan den cual ta ofrece gas natural pa consumo, pero esey no necesariamente ta implica cu loke Aruba mester ta pas den esakinan. Un factor insigur grandi den consumo di volumen halto ta e refineria, cu segun nos no lo concretiza, banda di e consumo eventual di WEB. Esaki tabata e interogante caba bao di e anterior gabinetenan democrata-cristian y actualmente, cu e casi certeza cu no tin un renacimento di e refineria, esaki ta significa contempla solamente e consumo di e planta di electricidad y awa. Esey a trece e compania Mericano cu ta proyecta establece un facilidad na Aruba riba e idea pa ofrece un punto di distribucion regional aki, pero esey ta parce un deseo dificil di cumpli, pasobra e region aki desde varios aña no ta carece di punto di distribucion di gas natural. Tin forma di uso di gas natural den forma chikito tambe, por ehemplo den tanki cu ta fit den e tamaño di un container regular, pero esey lo no trece e transformacion den uso di gas natural como alternativa limpi pa genera energia. Ademas, Aruba ta un mercado chikito pa esaki tambe.
En todo caso, mirando e panorama local di energia, ta dificil imagina avance si no ta contempla otro forma di yega na un mezcla alternativo di forma di energia. E tarea ta pa minimaliza e uso di combustible fosil, pero den teritorio chikito y riba nan mes manera un isla, hopi biaha no por garantiza un suministro cu suficiente backup, nan ta ‘stand alone’, sin usa algun forma di seguridad den forma di un elemento di combustible fosil, por ehemplo gas o fuel oil. Un di e alternativanan cu tin ta por ehemplo e uso di hydrogen, pa logra almacena energia electrico na un manera limpi. Pa por haci esaki, lo mester pa cuminza mas energia electrico limpi, sea di panel solar o di molina di biento, pa despues genera hydrogen cu por almacena, pa despues usa esaki na momento necesario pa cubri e momentonan cu otro forma di energia electrico alternativo no ta disponible. Bentaha ta tambe cu hydrogen ta un forma di combustible disponible di inmediato cu ta duna un tempo di reaccion, y activacion, di produci electricidad hopi cortico, un bentaha grandi den e tipo di produccion di electricidad cu nos tin. Por ta cu den esaki tambe por presenta problema di escala. Bentaha adicional di kima hydrogen ta cu e ta kima ‘limpi’ y den e proceso ta produci… awa, algo indispensable pa nos tambe. Ta logico si cu den e uso di hydrogen den e set up aki, esey no ta kita cu mester produci suficiente energia renovable pa e consumo diario di e isla, si mester logra haci e cambio.
Mirando e panorama aki, e pregunta ta unda ainda tin beneficio di haya cu e medionan disponible actualmente. Den esey lo mester contempla e uso mas amplio di energia solar y di biento. Te awor, fuera di e proyectonan grandi manera na aeropuerto y na refineria, no tabatin un plan viable di stimula produccion di energia solar na escala mas chikito, di ningun gobierno durante ultimo decada. Tur loke a realiza tabata puro iniciativa priva, loke riba su mes ta bon, pero no lo logra e cambio grandi cu mester pa haya ciudadano cuminza inverti mas masivamente den por ehemplo energia solar. Si ta continua cu e maneho actual unda ta existi e impresion cu e companianan envolvi, WEB y Elmar, no tin mucho gana di pasa pa un modelo cu hopi productor priva chikito, loke lo tin su problemanan di administracion, y no tin iniciativa tampoco for di gobierno, anto no lo no mira un cambio.
