Esakinan ta tempo di cambionan inevitable. Asina Su Mahestad Rey Willem-Alexander a bisa den su discurso na ocasion di Prinsjesdag, Apertura di Aña Parlamentario di Hulanda. “Historia ta un continuidad y liñanan cu ta sigui, pero tambe cambionan. Y particularmente e crisis di corona cu ainda ta afecta nos bida.”
Manera ta tradicion, Staten Generaal di Reino a habri porta pa e hefe di Estado di Reino Hulandes pa hiba su discurso, cu tambe a inclui algun palabra dedica na e paisnan Hulandes den Caribe. Particularmente e reto economico cu e crisis di corona a brinda pa e paisnan.
Pone atencion na desaroyo internacional
Pero su enfoke tabata pa Hulanda. Rey Willem-Alexander a pone a atencion na otro crisis cu ta afecta no solamente Hulanda, manera cambio di clima y movecion di podernan rond mundo. Sinembargo, e problema di vivienda na Hulanda, e oportunidad igual pa enseñansa y mercado laboral y proteccion y fortificacion di estado di derecho tambe a keda menciona.
“E desaroyonan internacional grandi ta mustra kizas abstracto y leu, pero nan no ta. Cambio di clima a afecta Hulanda cu e inundacionnan, mientras cu desaroyo geopolitico a bira bisto cu imagennan di Afganistan. Pa 20 aña, comunidad internacional a hinca esfuerso pa stabilidad y siguridad, democracia y derecho di hende, ademas pa oportunidadnan pa hende muhe y mucha muhe. Pero awor, e Afgano femenino tin un futuro hopi turbulento.” Rey Willem-Alexander a papia di esnan cu Hulanda a logra saca di e pais, pero ta lamenta cu mester a laga un grupo di Afgano cu tabata yuda militarnan Hulandes atras y cu esey ta algo cu ta pisa riba e balornan di Hulanda y siguridad di e pais.
Y tur e desaroyonan aki tin efecto pa ciudadanonan Hulandes pasobra locual ta pasa rond mundo ta trece preocupacion, particularmente pasobra nan ta haya mas forsa pa motibo di e tono polarisante den comunidad. P’esey mes Rey Willem-Alexander ta recorda tur ciudadano Hulandes cu mester mira e realidad di Hulanda tambe, cu ta keda un bon pais pa biba. Un pais cu por midi su mes cu cualkier otro na nivel macro-economicamente. Y si traha hunto, por logra mas.
Gobierno demisionario
E presupuesto presenta ayera na Tweede Kamer ta den cuadro di ehecucion di un maneho continuo, mirando cu te ainda Gobierno di Hulanda ta demisionario. E escogencianan nobo lo mester keda pa e proximo Gabinete. Pero asina mes, e Gobierno demisionario mester responde na situacionnan urgente, manera cambio di clima, estado di derecho y vivienda.
Mientras cu e aña tras di lomba tabata den luz di e coronavirus, e futuro ta mustra cu por bolbe na interaccionnan normal. “Hopi hende ta den rouw pa perdida di famia y amigo, y otronan ainda ta lucha cu e efectonan di COVID-19, mientras un grupo di hoben y adulto mayor mester a confronta depresion. Pero e bunita ta e iniciativanan di ciudadanonan rond Hulanda pa yuda saca hende di nan isolacion. Como tal, mester keda duna atencion na e consecuencianan di coronavirus.”
Cuido di salud
Rey Willem-Alexander a gradici tur cu a sigui traha durante e pandemia y lockdown pa asina permiti e sociedad sigui draai, particularmente polisnan, docentenan, enfermeronan den diferente institucion. “E periodo nos dilanti ta pa yuda e grupo aki di profesionalnan den cuido recupera mentalmente y fisicamente, mientras cu na mesun momento mester bolbe haci e trabaonan regular di cuido, entre otro e tratamento y operacionnan cu mester a warda pa motibo di COVID-19.”
Den e mesun rosea, e crisis di corona e ilustra e importancia di colaboracion regional, nacional y internacional, pa evita un siguiente pandemia y con pa yuda tur pais ricibi vacuna. Ademas mester mira con pa organisa cuido di salud pa e keda di bon calidad pero toch pagabel. E tempo pa e combersacionnan riba e tema y tuma decision ta awor.
Hulanda ta pone 8 biyon euro disponible pa yuda tur cu a sufri un retraso den enseñansa pa motibo di e crisis di corona. Ademas lo tin 1.3 biyon euro pa por brinda asistencia mental na hobennan.
Economia di Hulanda
Rey Willem-Alexander a bisa cu economia di Hulanda ta para fuerte, sigur compara cu otro pais. Esey ta un compliment pa e comercio Hulandes cu ta innovativo y esey ta duna perspectiva na tur cu ainda mester participa. E sosten na empresanan a yuda hopi y manera di spera economia lo crece y desempleo ta keda abao. E debe di Gobierno a keda bao control y e poder di compra a mantene su nivel.
Reino Hulandes den Caribe
Rey Willem-Alexander a ilustra e diferencia cu e parti Caribense di Reino Hulandes. E crisis di corona a haci’e hopi mas dificil pa tur e paisnan Hulandes den Caribe, mirando cu e economianan a keda afecta pa un caida grandi den turismo. Pa loke ta Boneiro, St. Eustatius y Saba, islanan BES, e sosten financiero ta similar cu locual a duna nan Hulanda. Pero pa paisnan CAS, Corsou, Aruba y St. Maarten, nan a ricibi sosten di likides y a haci palabracionnan pa percura cu economianan di e paisnan aki bira resiliente y cu miho posibilidad pa wanta shock externo. Den e combersacionnan riba e tema aki ta keda importante pa sigui busca e union, un pensamento comparti. “Esey lo haci nos Reino mas fuerte.”
Hulanda di mañan
Di otro banda e forsa intrinsico di economia di Hulanda ta brinda espacio pa sigui traha riba e Hulanda di mañan, unda lo mester busca solucion pa problemanan cu ta rekeri mas periodo di Gobernacion, manera vivienda pagabel, infrastructura y energia sostenibel. Ya tin fondonan disponible pa mantene naturalesa y biodiversidad y reduci CO2. Pero alabes mester busca forma pa brinda agricultornan perspectiva. Tur esaki den cuadro di e palabracionnan haci den e Acuerdo di Clima, cu ta rekeri medidanan adicional, pa asina yega na e metanan stipula.
Dia Mundial di Paz
Prinsjesdag a coincidi cu Dia Internacional di Paz, cu ta enfatisa cu paz ta bringa perspectiva pa bienestar, cu ta inclui derecho humano, clima, siguridad, eliminacion di pobresa y stabilidad internacional cu ta inclui migracion. Hulanda ta sinti su mes solidario cu otro pais rond mundo y tin fondonan disponible pa yuda unda cu mester.
Como miembro di Union Europeo, OTAN y Nacionnan Uni, lo sigui busca strategianan den relacion cu China y Rusia, pero tambe cu Merca. “Pero nos mester inverti mas pa un maneho di siguridad denter di Europa,” Rey Willem-Alexander a bisa.
“E prioridad den Union Europeo ta pa recuperacion di e pandemia, atende conhuntamente e plannan pa mitiga cambio di clima y cuida e estado di derecho Europeo, unda e balornan ta fundamental. Den Union Europeo no por discrimina ningun hende pa motibo di edad, colo di cuero, creencia, inclinacionnan, sexo of descendencia.”
Tambe e Hefe di Estado a papia di e siguridad den Reino y na Hulanda, unda el a mustra cu organisacionnan criminal ta birando mas violento y sin merced. E asesinato di Peter R. de Vries ta un punto mas abao y ta bay tin fondonan adicional pa bringa e desaroyo aki na diferente nivel. Pero tambe mester inverti den siguridad digital pa brinda criminalidad cibernetico.
Pone man na curazon
Pero Gobierno Hulandes mester admiti tambe su propio foutnan grandi manera e tardanza pa yuda victimanan di temblor na Groningen y creacion di e crisis di toeslagen cu a crea hopi victima. “Mester pone man na curazon y drecha e foutnan aki y esun cu tin derecho di compensacion mester hay’e mesora.” Y Rey Willem-Alexander a enfatisa cu pa por haya confianza, Gobierno mester duna tempo y mas atencion pa ehecucion di maneho.
Su Mahestad a caba su discurso, brindando su sosten na e trabao di Parlamento di Hulanda y Reino y deseando tur hopi sabiduria den e periodo cu ta sigui.
Potret: RTL Nieuws.
