(AP) – Covid-19 oficialmente a mata mesun cantidad di Mericano cu e pandemia di Griep Spaño di aña 1918 pa 1919, cual ta e cantidad di aproximadamente 675,000 persona.

E poblacion di Merca un siglo pasa tabata solamente un tercer parti di loke e ta awe, nificando cu e griep a causa un daño hopi mas grandi, y hopi mas letal den e pais. Pero e crisis di Covid-19 ta un tragedia di su mes tambe, specificamente considerando e gran avance y conocemento cientifico cu nos tin desde e tempo aki, y e fracaso di probecha lo mas hopi posibel di e vacuna disponibel den e temponan aki.

“Partinan grandi di e sociedad Americano, y pio, nan lidernan, a ira e oportunidad aki afo,” experto den historia medico Dr. Howard Markel di e University of Michigan a bisa di e oportunidad pa vacuna tur hende eligibel.

Manera e Griep Spaño, e coronavirus probablemente nunca lo disparce completamente di nos sociedad. Na luga di esaki, cientificonan ta spera cu e lo bira un otro griep cu tin temporada halto y temporada abao, mientras cu e inmunidad ta fortalece pa medio di vacunacion y infeccion ripiti. Aunke esaki lo tuma mas tempo.

“Nos ta spera cu esaki lo keda como un griep, pero no tin garantia,” segun biologo di Emori University Rustom Antia, ken a sugeri un fin optimista na e pandemia, cual lo por pasa den algun aña.

Pa awo, e pandemia te ainda tin Merca y otro partinan di mundo firmemente wanta den su man.

Mientras cu e brotenan nobo motiva pa variante delta a cuminsa aumenta, e mortonan den Merca te ainda ta den un averahe di 1,900 pa dia, e cantidad mas halto desde maart, y e pais su cantidad en general ta na 674,000 desde dialuna merdia, segun datonan colecta pa Johns Hopkins University, aunke e cifra real tin rumor cu e cifra ta mas halto ainda.

E temporada venidero ta premira di trece un brote nobo, cu e University of Washington su modelo proyectando un cantidad di 100,000 Mericano adicional cu lo fayece di Covid-19 pa dia 1 di januari, cual lo trece e total di Merca na 776,000 morto.

E pandemia di Influenza den aña 1918 pa 1919 a mata 50 miyon hende globalmente, den un tempo unda cu e mundo tabatin un cuarto di e populacion cu e tin aworaki. Mortonan di Covid-19 globalmente aworaki ta para na 4.6 miyon.

E Griep Spaño su cantidad di mortonan den Merca ta un averahe, pa motibo cu e recordnan di e temponan aya ta incompleto, y no tabatin hopi comprension cientifico pa loke tabata causa e malesa. E figura di 675,000 ta bini di Merca su Centers for Disease Control and Prevention.

E fin di Covid-19 por pasa si e virus keda bira mas debil cu cada mutacion, y e sistema inmunologico di e ser humano sina cada biaha mas con pa combati esaki mas miho. Vacunacion y sobrevivencia di e infeccion ta e maneranan mas efectivo cu e sistema inmunologico por mehora y bira mas fuerte. Babynan cu ta ricibi lechi di pecho, ta ricibi e inmunidad pa via di nan mama.

Bao di e bista optimista aki8, muchanan cu bay scol por bira malo levemente, y esaki lo train nan sistema inmunologico. Mientras nan ta crece, nan lo carga e mesun memoria inmunologico, pa ora cu nan ta malo y vulnerabel, e coronavirus no lo ta un malesa peligroso mas, sino un griep comun.

E mesun resultado aki ta bay pa e hobennan vacuna, nan sistema inmunologico lo bira mas fuerte pa medio di e vacuna y infeccion leve.