Dialuna atardi a tuma luga dilanti bestuurskantoor e ceremonia di presentacion oficial di Gabinete Wever-Croes II, despues di e huramentacion di e ministernan. Durante e ceremonia Prome Minister Evelyn Wever-Croes a duna discurso y a presenta cada minister y nan ministerio pa e siguiente termino di gobernacion di e gabinete. E hoben Rechenel Statie tabata invitado special y a presenta un discurso durante e ceremonia.
E ceremonia a cuminsa cu e yegada di cada minister na bestuurskantoor sigui pa e discurso di e hoben Rechenel Statie. Durante su discurso Statie a comparti su vision pa su pais cu tabata concentra ariba e importancia y necesidad di union di tur ciudadano pa asina restaura pais Aruba bek y yud’e sigui crece.
“Un gobierno no por crea un sociedad fuerte su so, cada ciudadano mester duna di su parti pa logra esaki. Progreso y stabilidad real ta depende di cada hende cu ta biba riba nos dushi baranca. Awo mas cu nunca nos mester bin hunto pa nos por logra yega na e Aruba cu nos kier mira bek. Nos tur tin un parti importante pa hunga den e progreso di nos pais y nos gobierno tin un deber responsabilidad. Un pais caminda libertad ta bay pareu cu responsabilidad. Nos meta ta un Aruba, progreso y stabilidad”, el a expresa durante su discurso.
Prome Minister Evelyn Wever-Croes tambe a dirigi palabra na tur presente y na henter e pueblo di Aruba cu a sintonisa e ceremonia y el a haci presentacion oficial di Gabinete Wever-Croes II. Durante su discurso e Prome Minister a declara cu durante e proceso di e formacion di coalicion entre partidonan MEP y Raiz, su persona hunto cu Sr. Ursell Arends, lider di Partido Raiz, a scoge pa reuni cu mas di 100 stakeholders pa asina scucha kico ta e retonan cu cada un ta enfrenta y pa nan por tene cuenta cu esey durante e proceso cu ta nan dilanti saliendo di e pandemia di COVID-19.
“Loke mas a hala mi atencion di tur e reunionnan aki ta e optimismo, speransa y e deseo di cada un di e stakeholdernan aki pa ta parti di e solucion, y esey ta locual Gabinete Wever-Croes II ta ofrece, pa hunto, cu henter comunidad di Aruba, nos ofrece e solucion pa e retonan pasobra Aruba mester di nos tur. Nos no por hacie solamente cu e ministernan, nos mester di tur hende pa yuda nos. Tanto sector publico, sector priva, tanto gobierno como parlamento, tanto coalicion como oposicion. Na e momentonan ki Aruba mester di nos tur”, Prome Minister a expresa durante su discurso.
El a continua su discurso señalando cu Aruba a vota pa un coalicion y cu mester ricibi e balor cu e merece. El a splica cu cada partido lo sirbi y traha cu sinceridad, cu transparencia colegialidad, creatividad, pasion, disciplina y integridad pa logra lo maximo pa Aruba. “Partido MEP y partido Raiz ta cla y a tuma e timon di gobernacion pa traha pa Aruba mey mey di e lama turbulento cu nos pais ta pasando, pero cu tur fe y confiansa cu nos lo sali afo”, Prome Minister a bisa.
El a enfatisa cu Gabinete Wever-Croes II lo traha pa aumenta entrada, controla gasto y pa stabilisa finanzas publico, cu nan lo traha pa sigui mehora cuido di salud den comunidad. El a señala cu nan a reestablece e confiansa di paisnan rond mundo den e economia di Aruba, specialmente den turismo, cu nan a traha pa trece confiansa y innovacion den e area di enseñansa y cu nan lo sigui duna maximo atencion pa resolve e retonan social, specialmente di salud mental. El a subraya cu nan lo sigui cuida e medio ambiente y naturalesa y cu e introduccion recien di e plan di desaroyo teritorial cu reglamentacion, e ROPV, lo ta e guia pa haci esaki.
Pa finalisa Minister President a introduci e ministernan di Gabinete Wever-Croes II y nan ministerio. Minister Glenbert Croes ta encarga cu labor, energia y integracion; minister Endy Croes lo ta encarga cu enseñansa y deporte; minister Rocco Tjon ta encarga cu husticia y asuntonan social; minister Geoffrey Wever lo ta encarga cu asuntonan economico, comunicacion y desaroyo sostenibel; minister Dangui Oduber ta encarga cu salubridad y turismo; minister Xiomara Maduro ta encarga cu finanzas y cultura; y por ultimo minister Ursell Arends, lo ta encarga cu integridad, naturalesa, transporte, cuido di grandinan y lo eherce tambe como vice prome minister di Aruba.
