Docente, casa, mama. Pero den e comunidad deportivo, particularmente di ciclismo, Zetsia Piña ta conoci pa hopi como un atleta destaca, un ‘mountainbiker’ sin igual na Aruba y awor, e motor tras di Mimosas, grupo di hende muhe cu ta core mountainbike pa recreacion.

Zetsia a lanta den mundo di deporte. Su mayornan a hinca tanto e como su ruman for di chikito den deporte. Su mama, docente tambe, y su tata, un musico y instructor di landamento, tabata determina pa nan yiunan ta activo den deporte.

“Nunca nos tabata na cas. Semper tabatin algun cos di haci, cada biaha tin un proyecto. Y mi ruman muhe y ami semper tabata activo di un proyecto pa otro.” Y ta di e forma aki, a dicidi pa crea e grupo Mimosas, cu ta grupo di hende muhe di tur nivel atletico y edad pa simplemente core mountainbike hunto. “Mi tata, mi casa, mi yiunan ta sostene mi.”

Ciclismo

Su tata a cumpra e prome bais pa core riba caya tempo cu Zetsia tabatin nuebe aña. Tabata su casa kende 15 aña pasa a cuminza core mountainbike y a regal’e un mountainbike. Despues tabata Zaida Everon, kende tambe a gana hopi competencia di ciclismo na Aruba a invita Zetsia pa core cune. Asina e pasion pa perde den mondi y busca aventura a nace. “Mi no tabata sa cu mi lo a haya mountainbiking asina leuk,” Zetsia a bisa Bon Dia Aruba. “El a duna mi inspiracion pa haci algo pa otro hende muhe.” Everon no a sigui mas den mountainbiking pero Zetsia ta sinti cu e mester “’pay it forward,’” pues percura cu mescos cu Zaida tabata un motivacion p’e mes, cu e tambe ta inspira otro hende muhe pa subi un mountainbike y drenta un mundo diferente.

Asina Piña a dicidi pa participa na competencianan na Aruba y tambe den exterior. E tabata un persona cu a bira legendario memey di ciclistanan pasobra e tabata gana mayoria careda. “Mi tabata semper competitivo, for di chikito,” el a bisa. Y pa hopi aña, tabata Zetsia y kizas dos of tres coredo femenino cu a domina e area di ciclismo na Aruba, particularmente mountainbiking.

Pero despues di 10 aña, el a sinti cu ta suficiente y realmente no tabata kier tabata su so den coremento mas. Y asina a dicidi di kier otro enfoke.

Mimosas

Tabata durante e pandemia cu el a ripara cu toch hendenan ta hopi nan so. E mes tabata core hopi su so y a sinti cu e mester a organisa algo pa hende muhe cu tambe ta core nan so. “Bo no sa e alegria den mi curazon di mira asina hopi hende muhe hunto ta core bais. Sin cu ta huzga otro, sin cu ta balota otro. Hendenan cu ta bini hunto pa haci algo positivo. E union di e coredonan femenino ta hopi bunita. ‘I love it’”

E grupo a bira asina grandi cu awor tin cu reparti nan den algun dia. Por ehempel, pa esnan cu apenas ta cuminza, ta core hunto riba Dialuna. Pero pa yuda tur, Zetsia a dicidi pa cuminza duna training tambe y esaki ta riba Diamars. “Y riba e dia di training, tur hende ta mas cu bon bini. Locual mi ta busca ta circuito cu na final tur hende ta topa otro. Pues cada persona ta core y train segun su nivel.”

E club di hende homber cu ta core rond cu nan mountainbike semper ta clausura nan corida cu cerbez. Y Zetsia pensando riba kico por ta e bebida cu mas tanto un hende muhe ta aprecia y a bin cu e nomber Mimosa, e combinacion di champagne y juice di apelsina. “Despues di un cori, nos tabata busca algo pa bebe y el a bira Mimosa. Despues di algun corida hunto, semper tabata bay busca Mimosa pa bebe, pero awor ya e ta un regla cu ta prepara cu tur corida tin Mimosas, na final. Asina e nomber a pega.”

(Ta continua riba pagina 7.)

Atractivo di mountainbiking

Locual mountainbiking ta haci, ta cu e ta inspirador pasobra mester bay den mondi. E ta un actividad cu ta rekeri mes hopi esfuerso fisico cu un hende mes kier duna. Aunke no tur ora facil, pero e ta un oportunidad pa haya paz mental y gosa di naturalesa na mesun momento, banda di e actividad fisico. “Tin biaha mi ta core caminda tambe, mi ta bay mi so e ora. E ta un forma pa saca stress. Pa mi, e forma di saca stress, core bais mi so ta yuda. Esey ta mi manera pa ta mi so un rato. E ta dushi.”

Ciclistanan tambe ta parti di trafico

Riba dje, un bais ta accesibel pa tur hende. E ta relativamente facil. “E unico problema cu nos tin ta e trafico. Ainda automobilistanan no ta coopera.” Piña no por compronde pakico hende no ta realisa cu tin mas y mas ciclista riba caminda y cu nan tambe tin derecho pa haci uso di e infrastructura. “For di scol basico, tur hende sa cu ciclista ta forma parti di trafico y no tur ora ta comporta asina y esey mi ta haya lamentable.” Consecuentemente, e core mountainbike den mondi te ainda ta mas sigur, pa motibo cu por evita areanan unda tin hopi auto. “Mi ta core mi bais di caminda, pero mi tin cu admiti cu tin biaha e ta duna mi miedo, pues mi ta prefera mi mountainbike.’”

Consehonan

Como deportista ta sacrifica tempo liber pa logra gana. Pero e elemental pa aprecia e training, ta cu hasta ora di competi e mester sinti como si fuera ta core pa gusto, pa gosa di e momento. Ta e mentalidad aki ta yuda cualkier hende ta hopi mas exitoso tanto den su training, den su competencianan y finalmente den bida diario. Pasobra e coremento di bais no ta bira un peso mas, sino un momento pa sali di e rutina di ta docente di scol preparatorio, casa y mama. “Train duro pa ora bo core un careda, e ta manera un keiromento. Pero realmente mi momento di relaha ta riba un bais.”

Locual tambe ta bunita, segun Zetsia ta cu e mundo di ciclistanan na Aruba ta manera un famia. Tur ta habri cu otro, ta yuda otro y esaki ta sigur bisto ora cu ta competi hunto den exterior. “Nan ta mi famia. Bo ta haya hende di tur edad. Mayornan ta hinca nan yiunan den e deporte y ta core cu tur hende. Ta lanta muchanan cu e perspectiva cu semper nan por core bais.”

Y finalmente, Zetsia Piña ta conseha tur hende cu kier cuminza core bais, pa percura pa busca uno na midi, y pa pone e sienta na e haltura cu ta cuadra pa e curpa, pa evita problema despues. “Y train hopi. Train por lo menos 15 km pa biaha. Y planifica bo caredanan y sea consistente pa sigura cu ta keda usa e bais. Di e forma ey ta evita cu a largo e bais ta bira djis un caminda pa colga paña,” ta e comentario di Piña.