Cartera di Desaroyo Sostenibel den proximo dianan lo cay den man di Geoffrey Wever di partido Raiz na unda cu tambe lo haya e Bureau di Cannabis Medicinal, cu segun Armando Rudy Lampe den su ultimo discurso como minister di e area aki, esaki ta importante pa sigui cu e lucha pa por realisa un pilar economico nobo.

Lampe a indica cu nan a yega di haci varios conferencia di Desaroyo Sostenibel na nivel local y internacional, un di nan a tuma luga na Aruba riba e tema di cannabis na aña 2018 caminda cu el a señala cu “na un conferencia nos por a keda pasobra nos no tabatin ningun poder pa por a haci algo”.

Bureau Cannabis Medicinal ta cay bao minister di Salubridad Publico pero su proceso di legalisacion no a termina, ta p’esey cu tin un contradiccion eynan y realmente pa aworaki e bureau aki cu e minister di Desaroyo Sostenibel lo haya e por bira realidad e proceso di legalisacion cu mester continua, “pasobra si no e ta nace morto”, manera Lampe a bisa.

Bon Dia Aruba a tuma contacto cu Geoffrey Wever di partido Raiz ken ta esun cu lo fungi como minister di Asuntonan Economico, Comunicacion y Desaroyo Sostenibel den gobierno di Gabinete Wever Croes II y el a splica cu nan ta di acuerdo cu e proceso di legalisacion di cannabis medicinal lo wordo aproba pa motibo cu nan ta kere cu esaki por nifica un pilar economico nobo.

“Aworaki e tin dificultad pa lanta cabes pasobra e banconan internacional supuestamente no kier duna cooperacion pa habri cuenta pa companianan dedica nan mes na cultivacion di cannabis, e ora ey e tarea di e proximo gobierno cu ta bay cay bao mi encargo, ta pa bay traha cu un modelo cu internacionalmente ta aceptabel, cu nos por desaroya e industria aki y crea un pilar economico nobo, pero nos tin cu resolve, entre otro, e problemanan cu e banconan internacional y nos tin cu caba di designa e framework legal pasobra esey no ta cla, esey ta bay ta nos trabou pa rond af y pas’e den parlamento di Aruba y percura cu e industria aki cuminsa funciona”, Wever a comenta.

Na luna di december di 2019 durante un discurso di prome minister Evelyn Wever-Croes el a indica cu ya caba nan tabatin e prome documentonan pa loke tabata trata e legalisacion di cannabis medicinal na Aruba, na e momento ey e minister encarga cu Salubridad a firma e documentonan ey y esey tabata den proceso di legislacion, lo cual tabata den nan programa di gobernacion.

Minister di Salubridad Dangui Oduber durante un entrevista na radio na luna di april di e aña aki a expresa cu e ley tabata den parlamento, cu nan a prepara e Bureau Medicinal di Cannabis e cual a bira un departamento pero cu Ricardo Croes cu tabata parlamentario di partido Red Democratico “no a cumpli cu esaki, si realmente bo tabatin bo votadonan na pecho cu bo kier a cumpli cu bo programa di gobernacion, e programa cu bo a bay campaña cune, cu a haya voto p’e, pasobra e votadonan a vota pa sr Croes pasobra el a bisa cu e ta bay legalisa cannabis, pero ora e tabata aden e no a presenta e concepto di ley ni a presenta ningun amienda”, Oduber a sigura.

Wever a declara cu awor nan ta bay traha e cuadro legal y nan ta bay parlamento cune y parlamento mester aprob’e lo cual ta bay bira parti di e vision di e gabinete nobo, “nos tin un mayoria den parlamento pa aproba e leynan aki, e no ta un cuestion cu e ta bira algo cu nos no por realisa, pasobra nos tin un coalicion cu ta na fabor di e industria aki”, el a bisa.

Di mesun manera, Wever a sigura cu e no por papia di e motibo riba pakico bou di gobierno anterior e no a keda completamente cla y tabatin un desunion entre dos minister, segun el a menciona, pero loke e por bisa na e momentonan aki ta cu nan ta riba un linea cu nan ta bay desaroya esaki como un pilar economico nobo y door cu e ta cay completamente bao di nan encargo, nan ta bay tin e responsabilidad principal pa logra esaki tambe.