Trabao sin termina…O trabao no haci…?

Den traspaso di trabao di ministro saliente pa ministro entrante algun asunto importante a bin dilanti. Na promer lugar, mester bisa cu ta di aprecia cu ta tumando lugar un traspaso cu mester considera algo normal, pero cu na varios ocasion den pasado gobiernonan rival cu tabata entrega rienda, no tabata respeta. E colmo tabata naturalmente na 2017 unda por papia di un intento di sabotahe di e trabao di e siguiente gobierno, unda hasta mester a haci un esfuerzo grandi pa logra haya documentacion importante pa sigui goberna, cu no tabata na nan lugar. Esaki ta realmente inaceptable, y lo a pensa cu, pa evita repiticion di e bochorno aki, lo a percura pa legislacion pa regla traspaso na un manera obligatorio y cu sancion severo den caso di incumplimento. Esey sin embargo no a sucede den e cuatro añanan nos tras y ta di spera cu den e proximo cuatro lo haya e tempo y espacio pa percura pa e ley aki, cu ta di interes general. Pasobra al fin y al cabo, si no ta respeta propiedad publico, e documentacion publico completo, anto esnan cu no ta tuma paso por wel di grita, pero ta pone nan mes den mesun categoria cu esnan cu a comete e fechoria aki caba den pasado. Asina ta: manos a la obra, pasobra e bon marcha di e asunto entre dos gabinete casi identico aki no ta garantia cu den futuro e traspaso bon aki lo haya repiticion.

Interesante tabata tambe traspaso di e mandatario cu tabata responsable pa enseñanza, ciencia y desaroyo sostenible, unda e ministro saliente a confirma, pa loke ta desaroyo sostenible, cu no a logra practicamente nada. E mes ta declara cu el a bin haya nada, ni un departamento ni presupuesto, y cu esey a conduci na no continua e protocol di cooperacion cu TNO na 2019. Hecho ta cu despues a tene algun evento, pero e trabao berdadero cu mester a tuma lugar hunto cu otro ministerionan, nos no ta mir’e te awe. Esaki no ta implica critica riba e ministro aki so, ni tampoco na promer lugar. Tabata trata di un gabinete cu por a ser ‘acusa’ di tur sorto di cos, menos cu nan tabata comprende algo di loke planifica y inicia berdadero desaroyo sostenible ta encera. Y si no tene cuidao, e cartera aki ta keda un di e carteranan ‘fantasma’ sin contenido real, unda atrobe e partner menor den e coalicion no ta logra nada. Ta parce talvez demasiado critico pa tuma e posicion aki, pero e tin un splicacion.

Aruba na e momento aki ta den e contradiccion di mester vocifera un politica di desaroyo sostenible, mientras cu di otro banda no tin un perspectiva real di inicia un proceso asina. Mas bien ta ripiti lema pasobra tur pais ta haci esey. Esunnan cu ta logra berdaderamente haci algo den e sentido aki ta, parcialmente, ta e paisnan rico cu tin recurso amplio pa inverti den cambia nan propio rumbo economico. Na mayoria di pais na mundo, sin embargo, e asunto ta keda na puro lema y consigna, y no tin mucho ta sucede. Mientras tempo ta birando cortico, na nivel internacional no ta logrando tanto den por ehemplo e tratadonan pa mehoracion di medio ambiente, entre otro e pacto di Paris pa yega na reduci emision di gas dañino cu ta ocasiona calentamento global, cu su efecto riba entre otro subida di nivel di lama, cu su consecuencia conoci. Aruba no ta luci den sentido negativo den esaki, sino mas bien ta parti di e mayoria di pais cu no ta cumpli. Den ultimo añanan aki, bao di e mesun gabinete di cual nos lo haya un continuacion, nos por a mira lo contrario ta sucede, entre otro riba tereno di violacion di tratadonan internacional, entre otro di respet pa bida marino. Den ultimo dianan aki nos a mira e reaccion debil y timido, salvo algun mandatario, riba e problemanan di destruccion di naturaleza ocasiona pa e uso sin regla ni control di UTV, y e intimidacion inaceptable di ciudadano cu ta tribi protesta. Si tin un motibo pa nos cambia nos scepticismo pa mas optimismo, cu placer nos lo tuma nota di esaki. Pero si acaso e proximo cuatro aña ta bira un continuacion di loke nos a mira den e ultimo cuatro, no lo tin nada di celebra.

Pero esaki no ta e unico problema pa cu desaroyo sostenible. E problema fundamental ta cu no tin perspectiva real pa diversificacion di economia, mientras cu hasta un desaroyo mas sostenible den e sector principal, turismo, ta parce un deseo remoto, unda mas bien ta sigui riba e practica di turismo di masa. Nos ta tende de vez en cuando algun ‘lip service’ encuanto turismo sostenible, pero loke nos ta mira ta lo contrario, esey cada ciudadano por mira tur dia ta surgi na Eagle y Palm Beach, y mas despues na Sero Colorado tambe. Y, pa bolbe riba e tema di diversificacion, mira como algo indispensable, nos no ta mira nada ta cristaliza, al contrario. No lo tin refineria, ni cultivo di cannabis, ni un plan drechi pa agricultura, asina leu cu esey por yuda, y e sectornan ‘innovativo’ a keda na idea so. Pues no ta trata di trabao no termina aki, sino di trabao cu mester bay haci ainda.