Minister di Husticia demisionario Sr. Andin Bikker a haci traspaso oficial di e cartera di Integracion na Minister Glenbert Croes kende proximamente lo ta e Minister encarga cu Labor, Energia & Integracion.
Durante e acto aki, e mandatario a gradici Minister di Husticia pa su dedicacion incansabel den interes di nos Pais y a expresa cu sin duda lo keda haci un apelacion riba Sr. Andin Bikker su experiencia y experticio den cuadro di Glenbert Croes su tarea como e proximo Minister di Integracion den Gabinete Wever Croes II.
Minister Glenbert Croes ta sumamente agradecido pa e confiansa di Minister President pa e encargo nobo cu e tin e honor di carga den Gabinete Wever Croes II. E cartera aki ta brinda nos e oportunidad pa bay bek na e principionan riba cual pais Aruba a ser funda, a base di respet pa otro y den union.
Tur cu a bin Aruba pa lucha hunto cu nos pa construi un mihor futuro pa nan mes, ta na mes momento contribuyendo na un miho futuro pa Aruba. Integra den un pais ta sumamente importante. Integracion ta mucho mas cu djis un permiso laboral y/of di estadia. Integracion ta social, economico y cultural.
Segun un comunicado di prensa, cu union y integracion como su meta, Minister Glenbert Croes ta sintie sumamente honra di por sirbi nos Pais un biaha mas den Gabinete Wever Croes II.
