Diasabra ultimo tabatin un incidente cu pasamento di hangua na centro di deporte Jorge Nicolaas. Departamento di Salubridad Publico ta lamenta esaki hopi. Un hoben tabata na e centro di deporte pa pasa su di dos hangua di corona. E pasado di hangua a uza un hangua cu un rato prome a uza cu un otro hoben. Afortunadamente e pasado di hangua a descubri esaki mesora. Na momento cu a descubri esaki, ya a hinca e hangua un tiki caba den brasa di e hoben.
Mesora despues cu e pasado di hangua a descubri e fout, a informa hefenan di e team di pasa hangua. Salubridad Publico a stipula regla kico mester pasa den un caso asina. Ta uza mesun tipo di reglanan na Hulanda y internacionalmente. Completamente segun e reglanan ey, mesun dia a hiba e dos hobennan Fundacion Mariadal pa un test di sanger.
Dialuna ultimo mama di e hoben a entrega un keho na departamento di Salubridad Publico. E departamento ta atende e keho aki.
Na mes momento e departamento di Salubridad Publico ke enfatisa cu e departamento semper ta tuma medida di percusion cu bista riba siguridad di hendenan cu ta pasa hangua. Lamentablemente por pasa cu tin biaha algo ta bay robes pa motibo di fayo humano. Casi nunca esaki no ta pasa y den caso cu e pasa nos ta lamenta esaki hopi.
Pa e departamento di Salubridad Publico cuido despues di e incidente di e hendenan debolbi tabata hopi importante. Pa e motibo ey, mesora nos a bay combersa cu e mama. Comunidad por conta cu Salubridad Publico despues di e incidente aki lo ta mas severo y alerta. E departamento ta haci tur loke ta necesario pa evita e tipo di situacionnan aki den futuro.
