Ayera Parke Arikok a informa cu un boto a accidenta na e Area Marino Protegi Arikok y a dal den costa, bashando dos bari di gasolina y cantidad di restonan di e barco den Pool Natural (Conchi).
Team di FPNA tabata evaluando e daño ambiental y haciendo limpiesa na e area. Segun nan a informa, ta bay dura cantidad di dia prome cu e area ta safe atrobe pa actividadnan recreativo. “E restauracion natural di e area protegi aki por dura varios luna, si no aña”, e parke a indica.
Di su banda, polis a confirma pa portal noticiero NoticiaCla cu e incidente a tuma luga y cu nan a descubri restonan di e boto kibra den Conchi. Hunto cu esaki a encontra e gasolin cu FPNA a menciona, y ‘por lo menos’ 8 pa 9 saco blanco cu contenido ‘desconoci’, cu segun polis, mas probablemente ta droga cu tabata abordo di e barco.
Ademas a haya dos telefon satelite y un GPS den un saco di plastic chikito preto. Esakinan a keda entrega na autoridadnan competente di BFTO y UGC cu ta bay continua cu e investigacion.
Comunidad di Aruba a reacciona cu indignacion riba e hechonan, mirando cu a causa un destruccion asina severo na un di nos principal atraccionnan turistico y un area protegi di naturalesa di nos isla. Hopi a cuestiona ta ken mester para responsabel pa e suceso hopi lamentable aki.
