Noelia Khalil ta un hoben di apenas 27 aña di edad cu ta un medico profesional trahando na hospital di Aruba como un zaaldokter. E ta un hoben cu a crece como bailarina y despues a drenta den mundo di beyesa. Den un combersacion cu Bon Dia Aruba e ta conta di su experiencia den e mundo di beyesa, su experiencia trahando na hospital durante e pandemia y tambe di su nominacion, y triunfo, den campaña Unsung Frontline Heroes.

Noelia a studia medicina na Costa Rica. Despues di 6 aña el a gradua como basisarts y el a bin back Aruba y a cuminsa traha na hospital como zaaldokter na januari 2020, net prome cu e pandemia di COVID-19 a cuminsa.

E ta conta cu na principio di e pandemia e trabao tabata hopi duro. E no tabata sa kico pa spera ya cu mundialmente e tabata algo nobo. Aworaki, cu e di cuater ola, aunke e sa kico por spera caba, e ta bisa cu e ola aki tabata hopi mas duro.

“Na principio nos no tabata prepara p’e y e tabata hectic na comienso, vooral cu e cantidad di pashent cu tabata bin. Semper tabata duro, nos a haya 3 ola prome cu el a calma y aworaki cu el a bin back, mi por bisa cu e biaha akinan e tabata hopi mas duro, y esaki teniendo cuenta cu nos tabata prepara p’e, nos tabata sa kico pa spera door di e otro olanan cu nos a haya for di aña pasa, pero e biaha aki tabata hopi mas duro”, e ta conta.

Durante e pandemia CIBC First Caribbean Bank a haci un iniciativa den Caribe, “FirstCaribbean Unsung Frontlne Heroes”. E iniciativa aki tabata permiti conocir of familiarnan nomina un persona cu ta traha como frontliner durante e pandemia. Varios persona a wordo nomina manera polis, nurse y personal di ambulance, entre otro. Di tur e nominacionnan cada isla a scoge 3 heroe y Noelia a logra drenta den e top 3 di Aruba. Di e top 3 nominadonan nan a pone un storia y cualkier persona por a vota y di e manera aki Noelia a logra gana prome luga.

“Nos sa con duro nos a y ta traha, tur loke nos a sacrifica, con cansa nos tabata, y loke ami a haya mas bunita di e iniciativa ta cu no ta solamente e persona cu a gana so a ricibi un premio, pero e otro nominadonan tambe a ricibi nan premio di parti di CIBC bank. Y esey mi a haya super bunita, pasobra ya tur e fontlinernan ta traha y no por tin un premio so, dus esey mi a haya super leuk. E tabata e un bunita gesto cu CIBC Bank a haci”, Noelia a conta.

For di tempo e ta chikito, 8 of 9 aña, Noelia a participa den grupo di baile. Di e mundo di bailamento el a haci e transicion pa mundo di beyesa y e prome concurso den cual el a participa tabata Miss Teen Aruba Internacional. “Mi amiganan di baile a convence mi mama pa inscribi mi y esey tabata echt great, mi a gusta loke e mundo di beyesa ta, cu no ta solamente beyesa pasobra bo ta echt siña hopi”, e ta splica. “E ta un desaroyo di forma personal, den forma social, den tur aspecto y mi a gusta esey hopi”.

Noelia a logra bay cu e titulo maximo na Aruba y despues di esey el a sali rumbo pa El Salvador na unda el a representa Aruba den e certamen Miss Teen Americas; y ‘kinan tambe el a bay cu e titulo maximo. Despues di esaki Noelia no a competi mas den certamen di beyesa, ya cu el a continua su estudio na Costa Rica.

E ta conta cu e gusta e mundo di beyesa pasobra “bo tin e oportunidad pa crece den tur forma, bo ta siña conoce otro cultura, diferente forma di pensa”. E aña aki Noelia ta participando den un certamen internacional virtual y e ta spera cu proximo aña e por representa Aruba den un certamen internacional presencial.

Desde un edad jong Noelia tabata sa caba cu e kier a sigui un estudio den e ramo di medicina. P’e tur cos a cuminsa cu un programa di television cu a inspir’e. “Tempo cu mi tabata den vijfde klas basis e programa Dr. 90210 di cirugia plastico ta loke a inspira mi pa bay den medicina. Full mi carera, durante mi cinco añanan di Colegio Arubano y mi prome cinco añanan na Costa Rica, mi tabatin e mentalidad cu mi lo bira un ciruhano plastico of ciruhano reconstructivo, cu ta atende pashentnan cu pa motibo di enfermedad of cualkier accidente mester reconstrui algun parti di nan curpa back”, e ta conta. “Pero ora mi a yega na e parti di cirugia mi a ripara cu cirugia no ta pa mi y na e momento ey mi a cambia di opinion, pero semper mi tabata sa cu mi kier a bira un dokter”.

Por ultimo Noelia ta expresa su mensahe pa hobennan y henter comunidad di Aruba. “Cada un di nos ta bunita manera nos ta, no tin niun manera bo. Bo ta unico. Sin embargo beyesa y inteligencia ta bay man den man. No tin bunitesa sin inteligencia y si tin, e beyesa no tin balor. P’esey caba bo estudio, desaroya conocemento y haci husticia na bo beyesa”.