A tuma luga apertura di un cas special na Centro di Cuido den Palisiaweg. Esaki a bira un realidad di e storia di un mucha muhe handicap cu a wordo haya mara mas cu cinco aña pasa den un deposito. Su mayornan no tabatin un luga di cuido adecuado p’e. Esaki Ru Croes, presidente di Fundacion Ambiente Feliz.
Cede Aruba y diferente instancia a cuminsa planea pa hinca un proyecto den otro. A laga traha un plan pa cuido di personanan cu limitacionnan durante 24 ora pa dia. Tin dos cas cla caba en espera di nan clientenan.
Diferente instancia a mustra riba e importancia di un centro pa habitantenan di Aruba cu mester di cuido 24 ora pa dia debi na nan limitacion. Tabata consciente cu e fondonan no ta grandi y mester a cuminsa den un forma chikito.
Ya caba Ambiente Feliz a experencia limitacion di espacio pa e ciudadanonan aki, pa cual mesora a bisa cu esaki ta algo cu Aruba mester di dje. A cuminsa cu preparacion na 2015 y na 2017 a cuminsa cu lobbymento pa haya financiamento y subsidio. Na final di 2017 a haya un carta den cual Oranjefonds, Kansfonds, Innovatiefonds lo bay coopera pa duna un contribucion cu tabata basta grandi. E temporada ey a nace Sociale Crisis Plan y a hinca e proyecto aki den dje. Asina a dicidi pa uza casnan bashi den Centro di Cuido na Palisiaweg pa ubica esnan cu handicap multiple.
Despues di un caminda largo, a pone un di e casnan bashi den Centro di Cuido pa e grupo vulnerabel aki cu tanto ayudo mester di dje. Den algun luna ta spera cu e otro dos casnan tambe lo habri nan porta.
E mainta aki a hiba palabra Minister Glenbert Croes, kende tabata envolvi tras di e proyecto aki, Daniel Tecklenborg (CEDE Aruba); Prome Minister Evelyn Wever Croes y Suhail Croes Gomez (Hefe di unidad di Centro di Cuido San Nicolas.
