Desaroyo turistico mester tene cuenta cu naturalesa
Interes particular hunto mester sirbi e colectivo, particularmente riba tereno di sostenibilidad. Esey tabata e mensahe cu Gobernador Alfonso Boekhoudt a duna na Parlamentarionan durante su discurso di Apertura di Aña Parlamentario nobo.
Y pa Minister Dangui Oduber, el a capta e mensahe aki cla y raspa. “Nos tur ta consciente di e mensahe cu Gobernador kier a manda pa comunidad y Gobierno den cuadro di desaroyo economico, unda mester tene cuenta cu medio ambiente y naturalesa,” Oduber a bisa Bon Dia Aruba. “Mester yega na e balans necesario cu no por stop desaroyo, pero mester ta hopi mas consciente cu cada uno.”
Dangui Oduber a señala cu ya caba Gobierno ta haciendo su parti. “Si mira den e ultimo añanan, e maneho di Ministerio di Turismo, e ta uno di ‘volumen abou, impacto halto’. Esey ta nifica cu nos ta habri pa mas desaroyo, pero no manera cu e tabata den e ultimo decadanan, unda tabata mira hotelnan di dos a 300 camber. Nos ta pensa awor riba hotelnan di menos di 100 camber, boutique hotels pa asina conserva y preserva nos naturalesa.”
Esey ta e enfoke di e proximo Gobierno, den coalicion cu partido Raiz cu tambe tin esaki como nan punto mas importante, segun Oduber. “Naturalmente den e proximo Gabinete lo tene cuenta cu cualkier desaroyo cu bin mester tene cuenta cu e aspecto ambiental. Ta den Conseho di Minister lo percura pa hunto crea e balans cu nos tur ta consciente di dje, pasobra nos tur sa cu a afecta naturalesa y medio ambiente den e ultimo añanan, cu tur e desaroyo cu a bin.” Den concepto di Dangui Oduber, Minister di Turismo, e impacto ambiental tabata resultado di un desaroyo economico grandi di Aruba, pero awor ta realisa cu no tin mucho mas espacio disponible. “Pues nos mester ta hopi mas ‘kieskeurig,’ cua ta e desaroyonan cu nos como pais y Gobierno ta scoge p’e.”
No mas ‘free for all’ pa operacion di UTV/ATV
Ehempel di e desaroyo aki ta e explosion di un sector turistico unda no tin ningun tipo di regulacion, cu ta e tournan di UTV. Minister di Turismo Oduber ta bisa cu e tema ta topico di un discusion continuo den ultimo añanan, unda tin un grupo preocupa pa e consecuencianan di UTV riba naturalesa y medio ambiente di Aruba. “Esaki ta un prioridad cu nos a pone tambe pa e proximo Gobierno. Ya caba nos a sinta cu tur stakeholders.”
E Minister a mustra cu berdad ta trata di un sector cu ta genera hopi placa y ta crea cupo di trabou. Pero mescos cu ta e caso cu tur desaroyo economico, tambe mester bin cu un balans den e actividad aki pa evita cu tur e personanan den e sector lo por perde nan trabou. “Na final, nan tambe ta tata y mama di famia. Pero mester bin cu reglanan si, regulacion di kico por y no por pa asina como Gobierno por proteha areanan di naturalesa. E no por ta un free for all mas, manera e tabata e ultimo añanan.”
Minister Oduber a bisa cu e discusion riba e tema di UTV lo continua den e proximo Gobierno, entre esnan cu ta di e sector di UTV/ATV y tambe esnan cu ta bin na vanguardia di naturalesa. Hunto mester purba yega na un balans, un consenso cu tur hende por biba cune.
Segun Oduber e ta un punto di prioridad pa e proximo Gobierno, particularmente mirando cu Formado ya caba a reuni cu tur esnan envolvi y tin un papel di hunga den e solucion. “Tur a expresa nan pensamento. Esnan cu ta representa e companianan tambe ta reconoce cu e forma con nan a anda cu e actividad di UTV/ATV mester cambia, y nan ta dispuesto pa contribui na un desaroyo sostenibel, pasobra esey ta locual nos tur kier como pais. Un desaroyo economico y di turismo cu ta keda sostenibel pa cada un di nos,” e Minister a conclui.
