E trayectoria pa yega na formacion di Gobierno nobo a tuma largo a pesar cu tanto MEP y Raiz a duna di conoce di kier traha cu otro, mesora despues di eleccion dia 25 di Juni.
Y a bin hopi speculacion riba e motibo pa kico e formacion a tarda, particularmente mirando cu tabata e propio ex-lider di MEP, ex-Minister President y tata di Minister Dangui Oduber, esta Sr. Nel Oduber kende tabata haci expresionnan riba rednan social, cu tabata basta critico contra Formador.
Pero Dangui Oduber mes a bisa Bon Dia Aruba cu e ambiente entre e dos partidonan ta hopi positivo. “Mi ta considera cu e partnernan nobo ta hendenan di mi mesun edad, aunke relativamente nobo den politica, cu tin e mesun manera di pensa. Cada ken ta para responsabel pa nan expresionnan riba media social. Mi tata ta keda mi tata cu su derecho liber pa expresa su mes. Ami nunca ta bisa mi tata con e mester expresa su mes.”
Dangui Oduber a señala cu hopi cu conoce Nel Oduber sa cu e tin su pensamentonan fuerte y cu e no ta sconde di expresa nan. “Mi ta respet’e. E formacion berdad a tarda un poco, pero esey ta debi na e hecho cu tur hende mester a pasa e proceso di screening y esey a tuma mas tempo cu a spera.”
Oduber en todo caso ta contento cu tin un Gobierno y ta cla pa sirbi interes general. “Ta partnernan nobo cu den liña grandi tin e mesun cuadro di pensamento cu esun di partido MEP. Mi ta anticipa cu nos lo tin un gobernacion hopi mas trankilo den comparacion cu Gabinete Wever Croes I.”
