Durante un conferencia di prensa, pediatra Dr. Jamiu Busari hunto cu director di hospital Sr. Jacob Vroegop, a lansa oficialmente e proyecto Jump18. Jump18 ta un proyecto lidera pa Dr. Busari y ta enfoca ariba e salud di e mucha- y hobennan na Aruba cu ta sufri di sobrepeso of obesidad.

Jump18 ta un programa specialmente pa mucha entre 4 y 18 aña di edad, cu tin sobrepeso of obesidad. E programa ta consisti di 6 luna y ta enfoca ariba 4 pilar; educacion, alimentacion, actividad fisico y investigacion. E programa ta consisti tambe di consulta cu un pediatra, un dietista y un case manager.

E team di e proyecto Jump18 ta consisti di cinco hoben Arubiano cu hunto cu Dr. Busari a mira e necesidad pa crea un proyecto pa conscientisa y enfoca ariba e salud di nos muchanan. “E proyecto ta bay over con nos por cambia e estilo di bida di e muchanan aki na Aruba y mientras nos ta bezig ta cambia e estilo di bida nan mester por disfruta di e proceso aki”, Dr. Busari a bisa.

Busari ta splica cu segun informe di UNICEF, aki na Aruba sobrepeso y obesidad ta un di e problemanan mas grandi entre muchanan y hobennan di 4 pa 18 aña di edad. Loke tambe el a enfatisa ta cu aki na Aruba, segun un informe World Health Organization (WHO) ta mustra cu un gran cantidad di baby cu ta nace aki na Aruba ta mas grandi cu e promedio normal.

“Esaki kiermen, si nos kier evita e problema di sobrepeso y tur e problemanan cu ta bin hunto cune, cu durante e prome 1000 dianan despues di nacemento di un baby nos mester cuminsa cu diferente manera of intervencion pa evita sobrepeso y obesidad”, Dr. Busari a splica.

E meta di e proyecto Jump18 ta pa den e proximo lunanan of añanan ta, di un manera hopi agradabel, laga e muchanan hunto cu nan mayornan participa den e proyecto unda cu nan lo come mas saludabel, unda cu nan lo ricibi mas informacion di con pa come saludabel y caminda nan lo tin mas movecion. “Mi ta spera cu hunto cu e comunidad di Aruba nos por mehora e salud di nos muchanan”, el a bisa.

Director di hospital, Sr. Jacob Vroegop, tambe a hiba palabra y a enfatisa cu e proyecto aki ta pa e muchanan, y nan mayornan tambe, pero specialmente pa e muchanan mehora nan salud. El a splica cu ta hopi importante pa tin un hospital cu por yuda tur persona cu tin mester di ayudo, y problemanan cu por wordo evita, manera sobrepeso y obesidad pa un gran parti mester traha riba dje y introduci prevencion. “Mi ta kere cu Jump18 nos a dal e prome stap chikito pa traha riba e problema aki”, el a bisa.

“Realmente mi ta spera cu Jump18 un programa grandi por cuminsa, y e minister di salubridad y turismo, Minister Dangui Oduber, a anuncia caba cu a pe siguiente periodo di gobernacion, prevencion pa sobrepeso y obesidad lo bira un punto hopi importante. Mi ta spera cu hunto cu nos e por bisti e handschoen y yuda nos combati esaki”, el a agrega.

Sr. Vroegop a indica cu e lo dura un tempo largo prome cu por logra un cambio di estilo di bida saludabel na Aruba, pero e tin e confiansa, y speransa tambe, cu dentro di varios aña y varios generacionnan cu e proyecto chikito aki por garantisa finalmente cu e poblacion di Aruba por bira mas saludabel.

Sr. Vroegop a gradici e sponsornan di e proyecto aki y cu un alegria grandi, hunto cu e team di Jump18, a ricibi un check di parti di Ennia, un di e sponsornan, pa 10 mil florin cu lo contribui na e comienso di e proyecto aki. Alabes el a expresa su orguyo di e team completo di Jump18. “Mi ta sumamente orguyoso cu e comienso di Jump18 y di tur esunnan cu a traha riba dje y di tur e sponsornan cu a haci e comienso di e proyecto aki posibel”.