Bureau Rampenbestrijding contento cu trabao di Fundacion Pa Nos Comunidad

E reparticion di pakete di cuminda pa esnan mas afecta pa e crisis di COVID-19 a continua y locual tabata core pa cuenta di Hulanda, awor ta responsabilidad di Aruba. Y e instancia cu mester ehecuta e proyecto aki ta Fundacion Pa Nos Comunidad.

Fundacion Pa Nos Comunidad, FPNC. a haya e encargo pa reparti e paketenan di cuminda entrante 1 di Juli. E paketenan ta cubri pa presupuesto di Aruba mes, pa un total di 14 miyon, despues cu Hulanda a financia esaki pa un aña na momento cu e pandemia a yega Aruba. E ayudo di Hulanda tabata pasa pa medio di Cruz Cora, cu tabata haya asistencia di Fundacion pa Nos Comunidad cu tin hopi aña caba ta maneha e banco di cuminda.

E proyecto mes ta bao responsabilidad di Bureau Rampenbestrijding Aruba, BRA. “BRA a tuma e responsabilidad cu prome tabata den man di Cruz Cora. FPNC ta djis ehecuta e proyecto. Banda di esey, nos tin nos mesun hendenan cu semper tabata ricibi sosten di cuminda,” Director Gianaika van der Biezen a bisa Bon Dia Aruba.

Transicion Cruz Cora pa FPNC

E transicion di e trabao di Cruz Cora pa FPNC no a bay asina facil, pasobra pa motibonan di no por a comparti e data di e personanan cu tabata ricibi e paketenan di cuminda y/of e vouchernan pa cuminda. Consecuentemente, a avisa tur hende cu mester a ricibi ayudo, pa registra di nobo y aki ta unda e proceso a pega un poco. Tin hende tabata haya e proceso dificil, y FPNC a cuminza brinda e servicio pa yuda e recipientenan pa inscribi pa e ayudo y a extende e inscripcion cu inicialmente tabata pa un siman so. Pero asina mes, a pesar cu a extende e proceso pa inscribi pa ricibi pakete di cuminda cu un siman adicional, hopi hende tabatin problema of no tabata compronde e proceso, cu a trece cierto tardanza. Ademas, e recipientenan tabata rekeri pa presenta cierto documentonan pa asina por a haci e screening necesario. “Esey tabata e reto mas grandi na principio,” Gianaika van der Biezen a splica. “Como fundacion, nos mester a tuma contacto cu tur e personanan, un pa un, pidi nan pa registra di nobo. Esey tabata proceso cu a tuma mas tempo. E paketenan mes no.”

FPNC tabatin experiencia caba cu e paketenan di cuminda, pero ta screening y documentacion tabata esencial pasobra tabata kier ta sigur ken lo a ricibi pakete di cuminda. “Nos a wak cu e clientenan tabatin dificultad cune.”

Un di e criterionan pa e ayudo di cuminda cu a pasa pa BRA tabata cu e hendenan mester tabata ricibi pakete di cuminda caba for di Cruz Cora, pa por ta eligibel pa e proyecto. Como cu Cruz Cora no a duna e data di e personanan cu tabata ricibi cuminda of voucher for di nan, mester a registra di nobo. Locual si FPNC a ricibi ta un codigo cu mester a cuadra cu e persona cu a bin registra pa pakete di cuminda. Di e forma aki mester a percura cu por evita ehempel ‘Pedro’ cu tabata ricibi pakete pero a bay Venezuela, y a pasa e carchi pa ‘Maria.’

Pendiente rapport pa Gobierno y Crisis Team

BRA a scoge pa entrega pakete di cuminda, en vez di duna vouchers. Pa hopi, e vouchernan tabata atractivo, pero intencion di e programa no ta pa e ta atractivo sino pa duna hende un asistencia te ora cu nan por sostene nan mes. “E voucher tabata pa un rato, pa e periodo di pandemia,” Gianaika van der Biezen a bisa Bon Dia Aruba.

Segun Director di BRA Rino Hermans, ainda mester specifica tur e informacionnan acumula y como tal no tin informacion concreto cu por duna ainda. Mester warda pa asina duna tempo pa traha un rapport detaya pa asina manda e dirigentenan di e programa. “Pero den liñanan grandi, Fundacion pa Nos Comunidad ta haciendo un tremendo trabao riba e proyecto di pakete di cuminda. BRA ta trahando ainda riba algun clasificacion di esnan cu ta ricibiendo e asistencia. E asistencia pa ayudo ta stabiel den e ultimo dos lunanan. Nos no a ripara ni aumento den peticion ni tampoco reduccion drastico.” Segun Hermans asina cu e clasificacion y cuantificacion di data ta cla, e por manda e informacion na Minister Presidente y tambe e Crisis Team.

Proceso pa cumpra producto den e pakete

E compra di e productonan manera a bisa na inicio, a sosode pa medio un destaho publico, pa evita conflicto di interes, mirando cu e fundadornan di FPNC ta doñonan di Frasa. Como tal mester a kita tur impresion cu a scoge cierto productonan di e compania. E resultado tabata cu tur mayorista a participa, y consecuentemente, e pakete ta inclui productonan di diferente compania. “ Tur mayorista por a manda nan oferta. Tabata dilanti un notario a habri e ofertanan pa scoge e productonan segun nan prijs. Y ta e prijs ta determina ken ta entrega cua producto Por ehempel, Compra ta entrega un producto, Hardin e otro y Caribbean Overseas tambe. “Tur compania a cay aden,” Gianaika van der Biezen a enfatisa.