Durante weekend ultimo, Departamento di Salubridad Publico, DVG a duna informacion riba e desaroyonan di e pandemia di Covid-19 na Aruba. Den su informenan diario, DVG a informa cu lamentablemente un persona mas a fayece cu Covid-19 riba diasabra. Cu esaki, e cantidad di fayecido na Aruba cu Covid-19 ta 47 persona desde cu variante Delta haci su introduccion.
E fayecido riba diasabra ta aumenta e total di fayecido cu Covid-19 na Aruba, desde inicio di e pandemia, na 155. Datonan di DVG ta indica cu for di comienso di juli cu e variante Delta a haci su introduccion na Aruba por observa cu di e 3917 casonan positivo cu a keda registra lamentablemente 47 persona a perde e bataya contra e virus di Covid-19 di cual 8 tabata vacuna y 39 no tabata vacuna.
Den su resumen di ayera diadomingo, DVG a indica cu 46 persona a recupera mientras cu a registra un total di 19 caso nobo di Covid-19, di cual 3 no ta residente y 16 ta residente di Aruba. E cifranan aki ta representa un tasa di positividad entre nos residentenan di 13 porciento.
E cantidad di casonan activo di Covid-19 ayera tabata 350.
Datonan ta ilustra casonan nobo di Covid cu un averahe semanal di 33 caso pa dia y un averahe di tasa di positividad semanal di 15 porciento pa dia.
Actualmente tin na Aruba 36 persona hospitalisa debi na Covid. Di esakinan, 9 ta den Unidad di Cuido Intensivo ICU, y 27 riba piso general. Tambe na Colombia tin 25 pashent di Aruba hospitalisa den ICU.
