(NLTimes) – Tweede Kamer kier pa e gabinete demisionario rapidamente tuma stap pa pone Tata Steel opera mas limpi y sosteniblemente. Varios partido a bisa cu, si ta necesario, gobierno mester inverti placa den e fabrica di staal mes, door di tuma un interes den esaki. Continua e maneho actual no ta un opcion pa ningun di e partidonan.

Investigacion di RIVM recientemente a mustra cu residentenan bibando den cercania di Tata Steel ta exponi na un concentracion demasiado halto di substancianan toxico. E productor di staal tambe ta e emisor di mas grandi di CO2 na Hulanda. E compania anteriormente a haci acuerdonan cu gobierno pa reduci emision, pero pa parlamento, esakinan no ta bay suficiente leu.

Parlamentario di VVD, Silvio Erkens ta kere cu Tata Steel mester cambia rapidamente na produccion ‘berde’ di staal. Minister Stef Blok di Asunto Economico mester investiga e posibilidadnan pa paga pa esaki. Erkens a yam’e ‘crucial pa nos futuro empleo y prosperidad’ pa e industria aki ta preserva na Hulanda. E no kier bira dependiente riba importacion di staal for di China, por ehempel.

Erkens a nota cu e compania mama Indio no tin intencion di inverti mas den e sitio na IJmuiden. Ta p’esey Blok mester consulta cu e compania mes y e Comision Europeo, entre otro, pa mira con por paga pa sostenibilidad. Den e pio scenario, gobierno mester cumpra un interes, e ta kere. E parlamentario di VVD a ricibi sosten riba e punto aki di, entre otro, Joris Thijssen (PvdA). Tambe el a envisiona un scenario den cual gobierno, como accionista, ta contribui na haci e fabrica di staal na IJmuiden mas sostenibel. Produccion di staal berde ta ‘tecnicamente posibel’, Thijssen a bisa. Pero el a destaca cu mester haci algo tocante e emision di substancianan dañino a corto plaso.

Blok no ta kere cu nacionalisacion ta e miho opcion. Blok a enfatisa cu gobierno mester enforsa reglanan pa seguridad y salubridad publico ‘indiscriminadamente’. E conclusion por ta cu e compania no por opera mas pa ganashi. E ora ey ta mas complica ainda si gobierno ta un accionista, segun e minister. “Con largo bo ta keda agregando extra, y esey ta miho cu gasta riba educacion of agentenan di polis?”

Henri Bontenbal (CDA) tambe ta kere cu gobierno mester considera un inversion asina den accionnan. E unico alternativa ta ceramento y esey ta bay costa miles di cupo di trabao. “Y desmantelacion tampoco ta gratis”, Botenbal a adverti.
Tom van der Lee (GroenLinks) tabata menos entusiasta. E no a descarta inversion publico, pero no ta su prome opcion. E lo prefera forsa e compania mama pa inverti su mes. “Ainda nos no a caba cu tur posibilidad pa pone presion riba Tata”, el a bisa.