Den segundo kwartaal di 2021, transaccionnan di divisa likida via Banco Central di Aruba (CBA) a resulta den un compra neto di e CBA di Afl. 193.2 miyon di divisa, loke tabata Afl. 52.9 miyon menos cu den e mesun kwartaal na 2020.

Segun un reporte publica riba website di Banco Central, a atribui e resultado aki principalmente na transacionnan cu gobierno. E transaccionnan aki a conduci na un compra neto di divisa di Afl. 196.1 miyon, compara cu e Afl. 404.5 miyon den e kwartaal correspondiente na 2020.

Di otro banda, e benta neto di divisa na banconan comercial a contrae cu Afl. 155.1 miyon na Afl. 12.1 miyon den e kwartaal bao revision.
E compra neto di divisa di otro clientenan a aumenta cu Afl. 0.5 miyon na Afl. 9.3 miyon. Como consecuencia di esaki, e reservanan oficial di CBA, incluyendo otro cambionan no relaciona na transaccionnan di divisa, a aumenta cu Afl. 203.7 miyon na Afl. 2,322.2 miyon pa fin di Juni 2021 (mira Table 1 y Chart 1).

A base bruto, e compra total di divisa di CBA a reduci cu Afl. 165.6 miyon of 33.5 porciento na Afl. 328.5 miyon den segundo kwartaal di 2021, compara cu e mesun kwartaal den 2020 (Table 2 y Chart 2). E contraccion aki tabata causa principalmente pa un reduccion di Afl. 204.4 miyon den compra di divisa for di gobierno, resultando den menos prestamo stranhero for di Hulanda asocia cu e situacion di Covid-19. Di otro banda, compra di divisa for di banconan comercial a aumenta cu Afl. 38.8 miyon na Afl. 78.4 miyon.

E benta total di divisa di CBA a cay cu Afl. 112.7 miyon of 45.5 porciento na Afl. 135.3 miyon principalmente pasobra benta di divisa na e banconan comercial a reduci cu Afl. 117.2 miyon na Afl. 90.6 miyon. Di otro banda, benta di divisa na gobierno a expande cu Afl. 4.0 miyon na Afl. 42.7 miyon.

Desaroyonan den prome seis luna di 2021
 Durante prome seis luna di 2021, transaccionnan di divisa likida via CBA a resulta den compra neto di Afl. 156.4 miyon den divisa, Afl. 159.6 miyon menos compara cu e mesun periodo na 2020.

E resultado aki tabata causa principalmente pa transaccionnan cu gobierno.
Compra neto di divisa for di gobierno a reduci cu Afl. 93.9 miyon na Afl. 224.6 miyon. Den contraste, tabatin un benta di divisa na banconan comercial, cu a aumenta cu Afl. 59.0 miyon na Afl. 80.3 miyon. Compra neto di divisa di otro clientenan a cay cu Afl. 6.7 miyon na Afl. 12.1 miyon.

Compra total di divisa a contrae cu Afl. 241.7 miyon, of 33.4 porciento na Afl. 481.7 miyon durante e prome seis luna di 2021, compara cu e mesun periodo na 2020. E reduccion aki tabata causa principalmente pa un reduccion den compra di divisa for di gobierno (-Afl. 132.8 miyon) asocia cu menos prestamo for di Hulanda menciona anteriormente. Compra di divisa for di banconan comercial (-Afl. 103.7 miyon) y otro clientenan (-Afl. 1.5 miyon) tambe a reduci.

Benta total di divisa a reduci cu Afl. 82.1 miyon of 20.2 porciento, na Afl. 325.3 miyon durante e prome seis luna di 2021. E contraccion aki a resulta di reduccion di benta di divisa na e banconan comercial (-Afl. 44.8 miyon) y na gobierno (-Afl. 39.0 miyon). Di otro banda, benta di divisa na otro clientenan a aumenta (+Afl. 1.6 miyon).