Trahado a perde trabao, y tin caso den Corte pendiente; Terenonan na Arashi a keda otorga contra procedura estableci pa DIP

Konkelmento cu tereno na Arashi a resulta den retiro di e persona encarga cu ‘matching’ di tereno cu ciudadanonan cu ta pidi tereno. Bon Dia Aruba a ricibi informacion cu como algun siman pasa a retira e señora, un trahado di DIP, kende tabata encarga pa aloca tereno erfpacht.

Ironia ta cu a kita e dama acusando e di a bay contra e procedura di DIP pa a saca e terenonan erfpacht, pero tur tres tereno duna tabata firma pa Director di DIP, dr. Haime Croes. Ademas, e señora a pasa e terenonan riba instruccion verbal di ex Minister Otmar Oduber, fuentenan yega na redaccion a bisa Bon Dia Aruba.

Manera ta conoci, ciudadanonan preocupa a denuncia cu a rosa un pida tereno grandi na Arashi y no tabatin claridad kico lo a bin na e area. Bon Dia Aruba a haci pregunta y e informacion cu a ricibi ta cu no ta trata di un proyecto hotelero y cu e area ta uno cu no ta protegi, pero cu motibo cu tin cu actua ta pasobra a rosa sin permiso, sin e aanlegvergunning. Director di DOW a bisa unicamente cu tabata trata di un disputa.

Sinembargo, aunke cu inicialmente tabata mustra un caso di un tereno cu a rosa e realidad ta cu ta uno di tres tereno erfpacht en total cu a otorga na Arashi. E tereno na skina tabata den number di un persona, pero di un of otro manera a bay pa e persona en cuestion cu a cumpli cu e condicionnan y a haya e tereno pasa pa medio di acta notarial na 2020.

E dos otro pida terenonan a bay pa personanan yega na ex Minister Otmar Oduber y Minister Demisionario Dangui Oduber, a informa Bon Dia Aruba.

Problema di e terenonan erfpacht ta cu a otorga nan contra e propio procedura cu ex Minister Oduber encarga cu Infrastructura a impone. Esta cu e prome cu pidi, ta e prome cu ta haya. Pero e ex Minister, contra su propio maneho, a duna instruccion na un ex colega di partido cu a haya e funcion den DIP, pa duna terenonan erfpacht na personanan cu no ta wardando mes hopi tempo pa haya tereno, sigur no mirando e lista largo di hende cu ta warda pa nan pida tereno pa traha nan cas.

Na Augustus 2020, lider di fraccion di AVP Marlon Sneek a haci pregunta riba e tema aki na e tempo ey, Minister di Infrastructura Marisol Lopez Tromp. Sneek a puntra si berdad tabatin konkelmento di tereno y cu e ex Minister, esta Otmar Oduber a desvia di su propio maneho y duna instruccion pa dos persona specifico haya tereno na Arashi. Y a pesar cu e maneho en general tabata pa duna terenonan erfpacht unda ya tin urbanisacion, pa asina purba scapa mas naturalesa posibel, a permiti pa duna dos tereno specifico den erfpacht, pa dos persona cu no a cana e procedura manera tur otro ciudadano. Na 2020, Sneek a bisa cu “semper DIP tabatin e area ey bon proteha. Diripiente a habri niun solo plot pa un solo persona.” Sneek a bisa cu e tabata kier sa cu ki meta DIP a cambia su maneho di hopi aña, y bao instruccion di ken el a sosode y pa cumpli cu ken. E tempo ey, Sneek a acusa e ex Minister di ta regala tereno nan compinchinan cu mester firma pa tereno den waf.

Realidad ta cu no tabata un tereno, sino dos tereno erfpacht cu a keda otorga contra e procedura regular di DIP. E asunto a bira asina un problema interno cu tres siman pasa a finalisa retiro di e dama cu a sigui instruccion di ex lider di POR. Problema sinembargo ta cu a culpa e señora, pero tabata Director Haime Croes mes kende a firma e actanan. Den otro palabra, cu e proceso a cana robes ta un hecho. Hecho ta cu a culpa un solo persona kende a haya instruccion di un superior. A pesar cu a culp’e, no a remedia e situacion. Es mas, Bon Dia Aruba tin entendi cu un di e personanan cu a haya tereno na Arashi tin pensa di hiba Gobierno Corte denter di algun siman pa demanda su tereno.

Berdad e terenonan aki no ta cay den e area berde, of natural segun e ROP, esta e Plan di Ordenanza Espacial, pero maneho di DIP lo mester tabata cu ta purba wanta areanan berde mas hopi cu por. E prome tereno ta di riba 1200 meter cuadra. Un tereno asina ta rekeri un aanlegvergunning, cu ta nifica cu mester laga Direccion Naturalesa y Medio ambiente evalua si tin especie di mata cu ta protegi ta crece eynan. Si esey tabata e caso ta e Minister di Infrastructura (actualmente Prome Minister Evelyn Wever Croes) lo mester duna dispensacion. Pero esey no a sosode. Di otro banda, personanan cu a informa Bon Dia Aruba di e situacion ta sinti cu kier usa e rosamento aki pa sconde di e problema mas grandi cu ta e dunamento di erfpacht na personanan cu no a cana e caminda debido y cu ta un ex Minister a yuda pa nan haya nan tereno erfpacht na un di e luganan mas caro di Aruba. “No ta un problema economico. E personanan cu a haya e tereno tin e manera pa traha nan cas. E problema ta e forma con nan a haya e tereno y e hecho cu a kita e persona cu a sigui instruccion pa duna nan e erfpacht, ta ilustrativo cu cos a cana robes na DIP. Pero locual ta tristo ta cu esnan responsabel pa duna instruccion y finalisa e proceso, entre otro e propio Director, no ta haya ningun consecuencia di nan acto,” ta locual a bisa Bon Dia Aruba.