(EFE) – Presidente di Colombia, Ivan Duque diamars ultimo a sigura cu e ta espera di cera e aña aki cu un miyon migrante Venezolano regularisa cu carchi di identificacion di Statuut Temporal di Proteccion, cu ta permiti nan tin acceso na siguridad social, salud y mercado laboral formal.
Den un declaracion cu representante special conhunto di Oficina di Halto Comisionado di Nacionnan Uni pa Refugiado (Acnur) y Organisacion Internacional pa Migracion (OIM) pa refugiado y migrante Venezolano, Eduardo Stein, Duque a balora e avancenan di e regularisacion.
“Nos a fiha e meta di yega na final di e aña aki cerca di un miyon migrante cu nan carchi di identificacion di statuut di proteccion temporal y avansa pa tin 800.000 mas entre januari y augustus di 2022” e mandatario a expresa.
E hefe di Estado a recorda cu mas di un miyon Venezolano ya caba a haci un “pre-registro virtual” y nan ta haciendo nan proceso di “reconocemento biometrico”.
“Esaki ta permiti nos di tin e regularisacion migratorio mas grandi cu a wordo haci na Latino America, pero di un manera bon articula cu un capacidad di respuesta di e servicionan di Estado”, el a sigura.
Segun Migracion Colombia, mas di un miyon di e casi 1.8 miyon Venezolano cu Colombia tin, ya caba a haci un cita pa e registro biometrico, cu ta e di dos etapa di implementacion di Statuut Temporal di Proteccion.
Esaki ta inclui “un registro unico di e migrante” pa Venezolanonan por tin acceso na beneficionan social di estado Colombiano, entre nan e vacunacion contra Covid-19 of e posibilidad di haya un rijbewijs.
E iniciativa aki a wordo anuncia na februari pa e presidente Duque, ken a señala cu esey lo tin un vigencia di dies aña y pa e cual migrantenan por solicita residencia.
